Samarqand xalqaro aeroporti 10-dekabrdan ishga tushadi

Samarqand xalqaro aeroporti 10-dekabrdan mintaqaviy va xalqaro reyslarga xizmat ko‘rsatishga tayyor, deya xabar berdi Uzbekistan Airports.

Qayd etilishicha, hozirda yangi aerodrom majmuasining qurilishi to‘liq yakunlangan. Uning tarkibida uzunligi 3 105 metr va eni 60 metr bo‘lgan yangi uchish-qo‘nish yo‘lagi, yangi taksi yo‘laklari va 24 ta samolyot stendlari uchun perron mavjud.

Shuningdek, aerodrom majmuasida IKAOning ikkinchi toifasiga mos keladigan zamonaviy energiya tejovchi yorug‘lik signalizatsiya uskunalari va qo‘nish tizimi o‘rnatilgan.

Ta’kidlanishicha, aerovokzal majmuasining qurilishi davom etmoqda.

Ma’lumot uchun, Samarqand xalqaro aeroportiga keluvchi va undan ketuvchi 20-oktabrdan 20-noyabrgacha rejalashtirilgan reyslar aeroport rekonstruksiyasi tufayli bekor qilingandi. Keyinchalik Uzbekistan Airports aeroportining yopilishi dekabr oyining o‘rtalariga qadar uzaytirilganini ma’lum qilgandi.