Samarqand viloyati Kattaqo‘rg‘on tumanida profilaktika inspektorlarining xizmat mashinasini yoqib yuborgan shaxsga sud hukmi o‘qildi, deb xabar bermoqda Oliy sud matbuot kotibi.
Ma’lum qilinishicha, 1-iyul kuni soat 19:30 atrofida jamoat joyi hisoblangan Kattaqo‘rg‘on tumani “Namozpolvon” mahallasi hududida mast holda janjal qilgan fuqaro ustidan shikoyat kelib tushgan. Profilaktika inspektori vaziyatni o‘rganish, janjal qilgan fuqaro bilan suhbat o‘tkazish maqsadida hamkasbi bilan uning uyiga borgan. Ammo u yerda tortishuv yana boshlanadi. Fuqaro IIO xodimlarining qonuniy talabiga bo‘ysunmagan va uyidan pichoq ko‘tarib chiqib, profilaktika inspektorlariga tashlangan.
Qayd etilishicha, xodimlar xavfsiz joyga o‘tib, tuman IIBdan tergov tezkor guruhini chaqirgan. Bu orada fuqaro uyi oldida qarovsiz qolgan xodimlarning xizmat avtomobilini yoqib yuborgan.
Ta’kidlanishicha, u Jinoyat kodeksining 277-moddasi 3-qismi “a” bandi (takroran yoki xavfli retsidivist tomonidan qilingan bezorilik), 219-moddasi 2-qismi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish; qanday shaklda bo‘lmasin o‘zining xizmat vazifasini bajarish yoki fuqaroviy burchini bajarishdan voz kechishga, shuningdek, qonunga xilof harakatlar sodir etishga majbur qilish yo’li bilan), 140-moddasi 3-qismi “a” bandi (jabrlanuvchini o‘z xizmat yoki fuqarolik burchini bajarishi munosabati bilan bog‘liq holda haqorat qilish), 173-moddasi 3-qismi “a” bandi (xizmat yoki fuqarolik burchini bajarishi munosabati bilan shaxsning yoki uning yaqin qarindoshlarining mulkini qasddan nobud qilish yoki unga zarar yetkazish) moddalari bilan aybdor deb topilgan. Unga nisbatan 4 yil-u 2 oy, o‘talmay qolgan muddati qo‘shilib, jami 4 yil-u 8 oy muddatga ozodlikdan mahrum qilish jazosi tayinlangan.
Mavzuga doir:
Izoh (0)