O‘zbekistonda 16 yoshga to‘lmagan shaxslar bilan jinsiy aloqa qilish va ularga nisbatan uyatsiz-buzuq harakatlar uchun jazo kuchaytirildi. “Bola huquqlarining kafolatlarini ta’minlash tizimi yanada takomillashtirilishi munosabati bilan ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun 7-dekabr kuni prezident tomonidan imzolandi va 8-dekabrdan boshlab kuchga kirdi. “Gazeta.uz”. kiritilgan o‘zgarishlarni izohladi.
Endilikda Jinoyat kodeksining 128-moddasi (16 yoshga to‘lmagan shaxs bilan jinsiy aloqa qilish) 1-qismida nazarda tutilgan jinoyatlarni sodir etganlik uchun 480 soatgacha majburiy jamoat ishlari yoki 3 yilgacha axloq tuzatish ishlari yoki 1 yildan 3 yilgacha ozodlikni cheklash yoxud 3 yilgacha ozodlikdan mahrum qilish bilan jazolanadi.
Avvalgi tahrirda bunday jinoyat uchun 380 soatgacha majburiy jamoat ishlari yoki 2 yilgacha axloq tuzatish ishlari jazosi belgilangandi.
Moddaga kiritilgan qo‘shimchaga ko‘ra, shunday jinoyatlar unga moddiy qimmatliklar berish yoki uni mulkiy manfaatdor etish orqali sodir etilgan bo‘lsa, 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolanadi
O‘sha harakatlar takroran yoki xavfli retsidivist tomonidan ilgari 118-modda (nomusga tegish) yoki 119-moddada (Jinsiy ehtiyojni zo‘rlik ishlatib g‘ayritabiiy usulda qondirish) nazarda tutilgan jinoyatlarni sodir etgan shaxs tomonidan sodir etilgan bo‘lsa, 5 yildan 7 yilgacha (ilgari 3 yildan 5 yilgacha edi) ozodlikdan mahrum qilish bilan jazolanadi.
Yangilangan 129-moddaga ko‘ra, shaxsning 16 yoshga to‘lmaganligi aybdorga ayon bo‘lgan holda, unga nisbatan zo‘rlik ishlatmay uyatsiz-buzuq harakatlar sodir etish 360 soatgacha majburiy jamoat ishlari yoki 1 yildan 2 yilgacha axloq tuzatish ishlari yoxud 1 yildan 2 yilgacha ozodlikni cheklash yoki 1 yildan 2 yilgacha ozodlikdan mahrum qilish bilan jazolanadi.
Avvalgi tahrirda shunday jinoyat uchun 300 soatgacha majburiy jamoat ishlari yoki 2 yilgacha axloq tuzatish ishlari yoxud 1 yilgacha ozodlikni cheklash yoki 1 yilgacha ozodlikdan mahrum qilish jazosi belgilangandi.
O‘sha harakatlar zo‘rlik ishlatib yoki qo‘rqitib sodir etilgan bo‘lsa endilikda 2 yildan 3 yilgacha axloq tuzatish ishlari yoki 2 yildan 5 yilgacha ozodlikni cheklash yoxud 2 yildan 5 yilgacha ozodlikdan mahrum qilish bilan jazolanadi.
Avvalgi tahrirda shunday jinoyat uchun 2 yildan 3 yilgacha axloq tuzatish ishlari yoki 2 yildan 5 yilgacha ozodlikni cheklash yoxud 5 yilgacha ozodlikdan mahrum qilish jazosi belgilangandi.
Bundan tashqari, 85-modda (ozodlikdan mahrum qilish) va 86-moddaga (jazo tayinlash) ham o‘zgartirish kiritildi — jinoiy javobgarlikka tortishning eng kam yoshi 13 yoshdan 14 yoshga oshirildi.
Bundan avval O‘zbekistonda shaxsga doir ma’lumotlarni muhofaza qilish bo‘yicha talablarni buzganlik yuzasidan javobgarlik kuchaytirilgani, hayvonlarga nisbatan shafqatsiz munosabatda bo‘lganlik uchun jinoiy javobgarlik kuchga kirgani haqida xabar berilgan edi.
Mavzuga doir:
- Toshkentda noma’lum shaxs maktabdan qaytayotgan o‘quvchi qizni berk ko‘chaga olib kirishga urindi (video)
- Yangiyo‘lda 8 yoshli maktab o‘quvchisini o‘g‘irlamoqchi bo‘lgan shaxs qo‘lga olindi. U muqaddam qotillik uchun sudlangan
- Qashqadaryoda 28 yoshli erkak 12 yoshli qizni yarim tunda o‘g‘irlab ketib, zo‘rlamoqchi bo‘ldi (video)
Izoh (0)