Toshkent viloyatining Yangiyo‘l tumanida 8 yoshli o‘quvchi qizni o‘g‘irlamoqchi bo‘lgan va qochib ketgan notanish shaxs Milliy gvardiya xodimlari tomonidan qo‘lga olindi.

Foto: Toshkent viloyati IIB matbuot xizmati

Milliy gvardiya matbuot xizmatning ma’lum qilishicha, 29-yanvar kuni soat 12:10 larda, Yangiyo‘l shahar 10-sonli umumiy o‘rta ta’lim maktabi 1-sinf o‘quvchisi A.S.ni maktabdan chiqqan vaqtida noma’lum shaxs qo‘lidan ushlab, “Yur, seni onang kutib turibdi, men oldiga olib boraman”, deb aldab, Yangiyo‘l shahar vokzali tomonga olib ketgan. Vokzal ko‘chasida joylashgan kabobxona ishchisi fuqaro A.A. yosh qizchaning yig‘lab qarshilik ko‘rsatishiga qaramasdan, qo‘lidan yetaklab ketayotgan erkak kishiga e’tibor qaratib, ular tomon yugurib borgan. Buni ko‘rgan noma’lum shaxs qizchani qoldirib, qochib ketgan.

Foto: Toshkent viloyati IIB matbuot xizmati

Fuqaro A.A. qizaloqni sog‘-salomat ta’lim olayotgan maktabiga yetkazib, sinf rahbariga topshirgan.

Tezkor chora-tadbirlar natijasida 4-fevral kuni soat 10:00 larda Milliy gvardiya qo‘riqlash xizmati xodimlari qidiruvdagi shaxsni Oqqo‘rg‘on tumani markaziy tibbiyot birlashmasiga qarashli oilaviy poliklinika hududida qo‘lga olib, Quyi Chirchiq tumani IIBga topshirgan.

Olib borilgan surishtiruv ishlari mobaynida ushbu shaxs Toshkent viloyati, Oqqo‘rg‘on tumanida yashovchi, muqaddam Jinoyat kodeksining 97-moddasi (qasddan odam o‘ldirish) 2-qismi, 164-moddasi (bosqinchilik) 2-qismi bilan sudlangan, 1983-yilda tug‘ilgan fuqaro X.T. ekanligi ma’lum bo‘lgan. Hozirda holat yuzasidan surishtiruv ishlari davom etmoqda.

Eslatib o‘tamiz, 3-fevral kuni 8 yoshli qizni begona erkak olib ketmoqchi bo‘lgani haqida ijtimoiy tarmoqlarda tarqalgan xabar asosida shahar IIB va prokuratura tergov harakatlari boshlagandi. Shu kuni Yangiyo‘l shahar IIB huzuridagi tergov bo‘limi tomonidan Jinoyat kodeksining 137-moddasi 2-qismi “a” bandi (odam o‘g‘irlash) bilan jinoyat ishi qo‘zg‘atilgandi.