Ўзбекистонда 16 ёшга тўлмаган шахслар билан жинсий алоқа қилиш ва уларга нисбатан уятсиз-бузуқ ҳаракатлар учун жазо кучайтирилди. «Бола ҳуқуқларининг кафолатларини таъминлаш тизими янада такомиллаштирилиши муносабати билан айрим қонун ҳужжатларига ўзгартириш ва қўшимчалар киритиш тўғрисида»ги қонун 7 декабрь куни президент томонидан имзоланди ва 8 декабрдан бошлаб кучга кирди. «Gazeta.uz». киритилган ўзгаришларни изоҳлади.
Эндиликда Жиноят кодексининг 128-моддаси (16 ёшга тўлмаган шахс билан жинсий алоқа қилиш) 1-қисмида назарда тутилган жиноятларни содир этганлик учун 480 соатгача мажбурий жамоат ишлари ёки 3 йилгача ахлоқ тузатиш ишлари ёки 1 йилдан 3 йилгача озодликни чеклаш ёхуд 3 йилгача озодликдан маҳрум қилиш билан жазоланади.
Аввалги таҳрирда бундай жиноят учун 380 соатгача мажбурий жамоат ишлари ёки 2 йилгача ахлоқ тузатиш ишлари жазоси белгиланганди.
Моддага киритилган қўшимчага кўра, шундай жиноятлар унга моддий қимматликлар бериш ёки уни мулкий манфаатдор этиш орқали содир этилган бўлса, 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади
Ўша ҳаракатлар такроран ёки хавфли рецидивист томонидан илгари 118-модда (номусга тегиш) ёки 119-моддада (Жинсий эҳтиёжни зўрлик ишлатиб ғайритабиий усулда қондириш) назарда тутилган жиноятларни содир этган шахс томонидан содир этилган бўлса, 5 йилдан 7 йилгача (илгари 3 йилдан 5 йилгача эди) озодликдан маҳрум қилиш билан жазоланади.
Янгиланган 129-моддага кўра, шахснинг 16 ёшга тўлмаганлиги айбдорга аён бўлган ҳолда, унга нисбатан зўрлик ишлатмай уятсиз-бузуқ ҳаракатлар содир этиш 360 соатгача мажбурий жамоат ишлари ёки 1 йилдан 2 йилгача ахлоқ тузатиш ишлари ёхуд 1 йилдан 2 йилгача озодликни чеклаш ёки 1 йилдан 2 йилгача озодликдан маҳрум қилиш билан жазоланади.
Аввалги таҳрирда шундай жиноят учун 300 соатгача мажбурий жамоат ишлари ёки 2 йилгача ахлоқ тузатиш ишлари ёхуд 1 йилгача озодликни чеклаш ёки 1 йилгача озодликдан маҳрум қилиш жазоси белгиланганди.
Ўша ҳаракатлар зўрлик ишлатиб ёки қўрқитиб содир этилган бўлса эндиликда 2 йилдан 3 йилгача ахлоқ тузатиш ишлари ёки 2 йилдан 5 йилгача озодликни чеклаш ёхуд 2 йилдан 5 йилгача озодликдан маҳрум қилиш билан жазоланади.
Аввалги таҳрирда шундай жиноят учун 2 йилдан 3 йилгача ахлоқ тузатиш ишлари ёки 2 йилдан 5 йилгача озодликни чеклаш ёхуд 5 йилгача озодликдан маҳрум қилиш жазоси белгиланганди.
Бундан ташқари, 85-модда (озодликдан маҳрум қилиш) ва 86-моддага (жазо тайинлаш) ҳам ўзгартириш киритилди — жиноий жавобгарликка тортишнинг энг кам ёши 13 ёшдан 14 ёшга оширилди.
Бундан аввал Ўзбекистонда шахсга доир маълумотларни муҳофаза қилиш бўйича талабларни бузганлик юзасидан жавобгарлик кучайтирилгани, ҳайвонларга нисбатан шафқатсиз муносабатда бўлганлик учун жиноий жавобгарлик кучга киргани ҳақида хабар берилган эди.
Мавзуга доир:
Изоҳ (0)