Австралия федерал парламенти мамлакатда инсон ҳуқуқларини бузиш, кибержиноятчилик ва коррупцияда гумон қилинганларга қарши шахсий санкциялар қўллаш имконини берувчи янги қонунни икки ўқишда қабул қилди. Бу ҳақда Австралия ташқи ишлар вазири Марис Пейнга таяниб, «ТАСС» хабар берди.
Қайд этилишича, «Магнитский актига асосланган қонун» деб ном олган қонун лойиҳаси Сенатда маъқуллангандан сўнг дарҳол Вакиллар палатаси томонидан ҳам бир овоздан қабул қилинган. Бу мамлакат расмийларига нафақат «инсон ҳуқуқларининг жиддий ва қўпол бузилишида, коррупцияда ва хакерликда» айбдор деб ҳисобланган шахсларни ўз ҳудудига киритмаслик, балки уларнинг маҳаллий активларини мусодара қилиш имконини беради.
Австралия ташқи ишлар вазири Марис Пейннинг сўзларига кўра, янги қонунчилик, шунингдек, ҳукуматга «қаерда юзага келишидан қатъи назар, халқаро аҳамиятга молик масалаларга ўз вақтида жавоб бериш» имконини беради.
«Ушбу жиноятларда айбдорлар ва улардан манфаат кўрувчиларнинг мамлакатимизга ва иқтисодиётимизга киришини тўсиб қўйиш орқали биз улар демократиямиз тақдим этган эркинликлардан фойдалана олмаслигини ва Австралия бундай одамлар ва ташкилотлар учун бошпана бўлиб қолмаслигини таъминлаймиз», — деди Пейн.
Шунингдек, янги қонун Американинг «Магнитский акти» тамойилларига асослангани, бироқ австралиялик қонунчилар унда «Австралия манфаатларига дахлдор зарарли киберфаолият билан шуғулланувчи шахслар»га қарши санкциялар қўллаш имкониятини ҳам қамраб олгани хабар қилинган. Сенатор Кимберли Китчингнинг сўзларига кўра, энди «қандай одамлар ёмонлик қилиши ҳақида тушунча мавжуд» экан, «ноқонуний даромадларини ҳимоя қилиш учун демократик институтлардан фойдаланишга интилаётган»ларга ҳукумат санкциялар қўллашдан тортинмаслиги керак. Келаси ҳафта парламентнинг ҳукуматга «бошқа мамлакатлар санкциялари остида бўлган шахсларнинг ишларини ўрганиш ва Австралия ҳам уларга чекловлар киритиши керакми ёки йўқлигини аниқлаш бўйича таклиф билан чиқиши кутилмоқда.
«Сергей Магнитский номидаги қонун устуворлиги ва жавобгарлик тўғрисидаги акт» АҚШда 2012 йилда қабул қилинган. Унда Вашингтон наздида мамлакатда инсон ҳуқуқлари бузилишида айбдор бўлган Россия расмийларига нисбатан бир томонлама санкциялар қўлланилиши назарда тутилган. 2016 йилда Қўшма Штатлар «Инсон ҳуқуқлари тўғрисида Магнитский номидаги глобал акт»ни қабул қилди, у «Магнитский қонуни»ни нафақат Россияга, балки бошқа мамлакатларга ҳам қўллаш имкониятини кўзда тутади.
Изоҳ (0)