Turkiya prezidenti Rajab Toyyib Erdo‘g‘on Nureddin Nebatini mamlakat g‘aznachilik va moliya vaziri lavozimiga tayinladi. Tayinlov borasidagi qaror rasmiy gazetada e’lon qilingan.
Hujjatga ko‘ra, Turkiya sobiq moliya vaziri Lyutfi Elvan iste’foga chiqqan. Vazirlarning almashinuvi Markaziy bankning asosiy stavkani pasaytirish to‘g‘risidagi navbatdagi qaroridan keyin turk lirasi kursining tushib ketishi fonida sodir bo‘lmoqda.
Lutfi Elvan Turkiya Moliya vazirligini 2020-yil noyabrdan beri boshqarib kelayotgan edi. Unga qadar vazirlikni Erdo‘g‘onning kuyovi Berat Albayrak boshqargan. 2015—2016-yillar davomida Elvan Turkiya bosh vaziri o‘rinbosari lavozimida ham faoliyat yuritgan. Nureddin Nebati tayinlovga qadar moliya vazirining o‘rinbosari lavozimida ishlab kelayotgandi.
Noyabr oyi davomida liraning dollarga nisbatan kursi 26 foizga, yil boshidan beri esa 40 foizga tushib ketdi. 23-noyabr kuni Istanbul va Anqara aholisi Erdo‘g‘onga qarshi norozilik namoyishi o‘tkazdi. Namoyishlardan so‘ng Turkiya Xavfsizlik bosh boshqarmasi namoyishlarga odamlarni ijtimoiy tarmoqlar orqali jalb etganlarga jinoiy ish qo‘zg‘atdi. Erdo‘g‘onning o‘zi lira kursining tushib ketishini “xorijlik agentlarning” nayrangi deb hisoblamoqda va asosiy stavkani kamaytirishni davom etish niyatini tasdiqlagan.
Izoh (0)