Pekin Jakartani Janubiy Xitoy dengizining bahsli suv hududlaridagi neft-gaz konlarini qazishni to‘xtatishga chaqirdi. Xitoy Indoneziyaga bunday so‘rov bilan birinchi marta chiqmoqda, deb yozadi Reuters manbalariga tayanib.
Reuters manbalariga ko‘ra, Xitoy hukumati Indoneziya tashqi ishlar vazirligiga xat yo‘llagan. Unda XXR o‘zining hududi deb hisoblaydigan joyga o‘rnatilgan Indoneziya dengiz parmalash qurilmasining ishini to‘xtatish talab qilingan.
“Bizning javobimiz juda qat’iy bo‘ldi – biz parmalashni to‘xtatmoqchi emasmiz, chunki bu bizning suveren huquqimizdir”, — dedi maktubdan xabardor indoneziyalik deputat Muhammad Farxon Reuters’ga.
“Bu ancha qo‘rqinchli edi, chunki bu Xitoy diplomatlarining xalqaro dengiz huquqiga asoslangan huquqlarimizga qarshi o‘zining to‘qqiz punktli chizig‘iga muvofiq kun tartibini ilgari surishga birinchi urinishi bo‘ldi”, — dedi Muhammad Farxon.
Indoneziya tashqi ishlar vazirligi vakili agentlikka “davlatlar o‘rtasidagi har qanday diplomatik aloqa shaxsiyligini va uning mazmuni oshkor etilmasligi”ni aytgan.
Janubiy Xitoy dengizining bepoyon suvlari, jumladan, Spratli arxipelagi va Parasel orollari ko‘p yillar davomida ushbu mintaqa davlatlarining ko‘p millatli nizosiga sabab bo‘lib keladi. Xitoy o‘ziga tegishli deb da’vo qilgan hududni to‘qqiz punktli chiziq bilan belgilab olgan. Ushbu U shaklidagi chiziq Xitoyning janubiy qirg‘og‘idan Borneo orolining shimolidagi suvlargacha cho‘ziladi. Janubi-sharqiy Osiyodagi boshqa davlatlar Pekinning belgisini tan olmaydi.
Janubiy Xitoy dengizi suvlarining qiymati boy biologik resurslar, Hind va Tinch okeanlarining dengiz yo‘llari chorrahasidagi strategik joylashuv, shuningdek, neft va mineral xom ashyoning potensial zaxiralari bilan ifodalanadi.
Izoh (0)