Germaniyaning Myunxen shahrida Deutsche Bahn AG kompaniyasiga qarashli qurilish maydonchasida aviabomba portladi. Ish vaqtida yuz bergan ushbu hodisa oqibatda uch kishi tan jarohati oldi, ulardan birining ahvoli og‘ir, deb yozadi Focus.
Portlash Myunxenning markaziy temiryo‘l vokzali yaqinida sodir bo‘lgan. Natijada ushbu hududda shaharlararo va shahar ichidagi temiryo‘l harakati to‘xtatildi, uning qachon tiklanishi hali e’lon qilinmagan.
Voqea joyiga politsiya otryadlari va tez yordam mashinalari yetib kelgan. Politsiyaning qayd etishicha, hodisa yuzasidan jinoyat izlari aniqlanmagan.
Associated Press’ning ma’lum qilishicha, aviabomba Ikkinchi Jahon urushi davridan qolgan.
Eslatib o‘tamiz, may oyida Rossiyaning Volgograd viloyatidagi qazish maydonlaridan birida Ikkinchi Jahon urushidan qolgan harbiy snaryad portlab ketgandi. Buning oqibatida ikki kishi halok bo‘lgan. Xususan, qurbonlarning biri 1961-yilda tug‘ilgan erkak, ikkinchisi 2005-yilda tug‘ilgan bola ekani xabar qilingan.
Izoh (0)