O‘zbekistonda 2021-yilning 30-noyabridan 7-dekabriga qadar MDH, Boltiqbo‘yi va Gruziya davlatlari IV “Yoshlar teatr san’ati” forumi bo‘lib o‘tadi. Bu haqda Madaniyat vazirligida o‘tkazilgan matbuot anjumanida so‘z yuritildi, deya xabar bermoqda “Daryo” muxbiri.
Ta’kidlanishicha, mazkur forum ilk bor 2012-yilda Moldovada, keyinroq 2015-yil Belarusning Minsk shahrida, 2018-yili Armanistonda o‘tkazilgan.
O‘zbekiston mezbonlik qilayotgan bu galgi xalqaro tadbirda Estoniya, Qozog‘iston, Qirg‘iziston, Gruziya, Ukraina, Rossiya, Tojikiston, Ozarbayjon kabi davlatlardan tashrif buyurgan jamoalar o‘z sahna asarlari bilan ishtirok etadi. Har bir spektaklni xorijlik mutaxassislardan iborat hay’at a’zolari baholab boradi.
“Forum xalqaro aloqalarni rivojlantirish, yosh rejissorlar, aktyorlar, rassomlar, teatrshunoslar ijodini namoyish etish va ijodiy tajriba almashish orqali ularga ijodiy muhitni yaratib beradi.
Quvonarlisi, ushbu tadbirda qatnashayotgan o‘zbekistonlik teatr ijodkorlarining barchasi yoshlardir. Forum tufayli teatr sohasida xalqaro hamkorliklar ham yo‘lga qo‘yilishi shubhasiz”, — dedi Madaniyat vaziri Ozodbek Nazarbekov.
O‘zbek Milliy akademik drama teatrida o‘tkazilgan tadbir ochilishida qayd etilishicha, forum doirasida O‘zbekiston davlat san’at va madaniyat instituti teatr yo‘nalishi talabalari uchun seminar-treninglar tashkil etiladi.
Ishtirokchilar “Ta’lim dasturi” laboratoriyasida malakali rejissor, aktyor hamda teatr tanqidchilaridan mahorat darslarini oladi, forum mobaynida birgalikda spektakl sahnalashtiradi. Ushbu sahna asari forum yakunida tomoshabinlarga namoyish qilinadi.
Ochilish marosimida Qozog‘iston davlat akademik bolalar va o‘smirlar teatri larining “Kulager” spektakl namoyishi bo‘lib o‘tdi.
Izoh (0)