Ўзбекистонда 2021 йилнинг 30 ноябридан 7 декабрига қадар МДҲ, Болтиқбўйи ва Грузия давлатлари IV «Ёшлар театр санъати» форуми бўлиб ўтади. Бу ҳақда Маданият вазирлигида ўтказилган матбуот анжуманида сўз юритилди, дея хабар бермоқда «Дарё» мухбири.
Таъкидланишича, мазкур форум илк бор 2012 йилда Молдовада, кейинроқ 2015 йил Беларуснинг Минск шаҳрида, 2018 йили Арманистонда ўтказилган.
Ўзбекистон мезбонлик қилаётган бу галги халқаро тадбирда Эстония, Қозоғистон, Қирғизистон, Грузия, Украина, Россия, Тожикистон, Озарбайжон каби давлатлардан ташриф буюрган жамоалар ўз саҳна асарлари билан иштирок этади. Ҳар бир спектаклни хорижлик мутахассислардан иборат ҳайъат аъзолари баҳолаб боради.
«Форум халқаро алоқаларни ривожлантириш, ёш режиссёрлар, актёрлар, рассомлар, театршунослар ижодини намойиш этиш ва ижодий тажриба алмашиш орқали уларга ижодий муҳитни яратиб беради.
Қувонарлиси, ушбу тадбирда қатнашаётган ўзбекистонлик театр ижодкорларининг барчаси ёшлардир. Форум туфайли театр соҳасида халқаро ҳамкорликлар ҳам йўлга қўйилиши шубҳасиз», — деди Маданият вазири Озодбек Назарбеков.
Ўзбек Миллий академик драма театрида ўтказилган тадбир очилишида қайд этилишича, форум доирасида Ўзбекистон давлат санъат ва маданият институти театр йўналиши талабалари учун семинар-тренинглар ташкил этилади.
Иштирокчилар «Таълим дастури» лабораториясида малакали режиссёр, актёр ҳамда театр танқидчиларидан маҳорат дарсларини олади, форум мобайнида биргаликда спектакль саҳналаштиради. Ушбу саҳна асари форум якунида томошабинларга намойиш қилинади.
Очилиш маросимида Қозоғистон давлат академик болалар ва ўсмирлар театри ларининг «Кулагер» спектакль намойиши бўлиб ўтди.
Изоҳ (0)