O‘zbekistonning AQShdagi elchisi Javlon Vahobov Facebook kompaniyasi bo‘limi direktori Endi O’Konnell bilan uchrashib, hamkorlik aloqalarini o‘rnatish istiqbollarini muhokama qildi. Bu haqda “Dunyo” axborot agentligi xabar qildi.
Internetda, xususan, Facebook, Instagram va WhatsApp platformalari orqali ekstremizm va radikallashuvning oldini olish bo‘yicha hamkorlikka alohida e’tibor qaratildi.
O’Konnell O‘zbekistonda davlat idoralari ochiqligi va so‘z erkinligini ta’minlashga qaratilgan chora-tadbirlarni yuqori baholadi. Uning so‘zlariga ko‘ra, Amerika kompaniyasi Shavkat Mirziyoyevdan mamlakatdagi Facebook platformasi va boshqa platformalarning uzluksiz ishlashini ta’minlashga qo‘shgan shaxsiy hissasi uchun minnatdor.
Bundan tashqari, Facebook IT-mutaxassislarini tayyorlashda yordam berishga tayyorligini bildirdi. O‘zbekistondagi har bir qiziquvchi talaba maxsus yaratilgan veb-sahifa orqali amaliyot o‘tash uchun ariza topshirishi mumkinligi aytildi.
Eslatib o‘tamiz, 3-noyabr kuni Axborotlashtirish va telekommunikatsiyalar sohasida nazorat bo‘yicha davlat inspeksiyasi (“O‘zkomnazorat”) Telegram, YouTube, Instagram, Facebook, “Odnoklassniki”ning O‘zbekistondagi faoliyatini cheklagandi.
Shundan so‘ng prezident matbuot kotibi Sherzod Asadov “O‘zkomnazorat”ning bir yoqlama, uzoqni o‘ylamay qilgan harakatidan davlat rahbari xabar topganini ma’lum qildi. Axborotlashtirish va telekommunikatsiyalar sohasida nazorat bo‘yicha davlat inspeksiyasi boshlig‘i G‘olibsher Ziyayev esa noto‘g‘ri va kelishilmagan xatti-harakatlari uchun egallab turgan vazifasidan chetlatildi. O‘zbekistonda ijtimoiy tarmoqlar faoliyatiga cheklov qo‘yilgani holati yuzasidan tergov o‘tkazilishi ma’lum qilindi.
Izoh (0)