Toshkent shahrida 22–27-noyabr kunlari “Innoweek.uz-2021” xalqaro innovatsion g‘oyalar haftaligi bo‘lib o‘tdi. “Daryo” muxbiri ushbu haftalik doirasida qanday yangi loyihalar namoyish etilgani, innovatsiyalarni joriy etishdagi yutuq va muammolar haqida Innovatsiyalarni joriy qilish va texnologiyalar transferi milliy ofisi bosh direktori Olimjon To‘ychiyev bilan suhbat qurdi.
Suhbat davomida “Daryo” muxbiring yoshlar ko‘pincha chet elda avval joriy etilgan yoki ishlab chiqarishga tatbiq etilgan narsalarni yangi innovatsiya sifatida ko‘rsatishi — velosipedni qayta kashf etishning kimga keragi bor, degan savoliga Olimjon To‘ychiyev quyidagicha javob berdi:
“Menga bu kabi savollarni ko‘p berishadi. O‘zim ishlab chiqarish sohasidan kelgan, avtomobilsozlik sohasida tahsil olgan inson sifatida masalani avtomobil misolida tushuntirishga harakat qilaman. Siz bilan biz biladigan xalqaro brendlar: Germaniyada Mercedes-Benz, AQShda General Motors, Yaponiyada Toyota kabi avtomobillar ishlab chiqariladi. Agar e’tibor berilsa, ularning o‘z modellari, o‘ziga yarasha yangiliklari, farqli va bir-biriga o‘xshash holatlari ham bor. Agar mana avtomobillar bor-ku, bu narsani ishlab chiqarishimiz kerak emas ekan, degan tushuncha bilan innovatsiyaga yondashadigan bo‘lsak, sal xato qilamiz. Chunki bu orqali o‘zimizni ma’lum darajada cheklab qo‘yamiz. Bu holatda boshqacha yondashuv zarur. Chunki biz ma’lum bir muddat o‘tgandan keyin ushbu texnologiyalarning yaratuvchisi emas, iste’molchisiga aylanib qolamiz. Shunaqangi yuqori xavfimiz mavjud. Aynan shularning oldini olish uchun ham biz o‘zimizda mahalliy yoshlarimizning g‘oyalari va takliflarini qo‘llab-quvvatlaymiz. Albatta, bunda xorijiy analoglardan farqli taraflari, o‘xshash taraflari, keyinchalik mahsulot, xizmat yoki loyihalarni qay darajada o‘xshashlik bo‘lish taraflarini muhokama qilgan holda tahlil qilamiz”, — dedi Innovatsiyalar milliy ofisi rahbari.
Olimjon To‘ychiyevning qo‘shimcha qilishicha, yosh innovatorlar, avvalo, ixtirolarni yaratishda u hayotimizni qaysi jabhasida qo‘llanishiga e’tibor berishlari lozim.
“E’tibor berilishi muhim bo‘lgan ikkinchi jihat — loyihani o‘sha ehtiyojga qarab takomillashtirish. Bular loyihaning hayotiyligini ta’minlashda eng asosiy omillardan hisoblanadi”, — dedi u.
Avvalroq “Innoweek.uz-2021” xalqaro innovatsion g‘oyalar haftaligida sun’iy intellekt asosida yaratilgan birinchi o‘zbek nutq sintezatori namoyish etilgani haqida xabar berilgan edi.
Izoh (0)