Qozog‘istonning Tashqi savdo siyosati va xalqaro iqtisodiy tashkilotlarda ishtirok etish masalalari bo‘yicha Idoralararo komissiyasining qaroriga muvofiq, 2021-yil 15-dekabrdan 6 oy muddatga tirik qoramol eksportiga taqiq joriy qilindi. Bu haqda “ElDala.kz” xabar qilmoqda.
Komissiyaning yig‘ilishi 25-noyabr kuni Qozog‘iston bosh vazirining birinchi o‘rinbosari Alixon Ismoilov raisligida bo‘lib o‘tdi.
Unda 15-dekabrdan boshlab Qozog‘iston hududidan 6 oy muddatga nasldor mollarni olib chiqishni to‘liq taqiqlash to‘g‘risida qaror qabul qilindi.
Shu munosabat bilan O‘zbekiston Veterinariya va chorvachilikni rivojlantirish davlat qo‘mitasi faoliyati chorva hayvonlarini import qilish bilan bog‘liq bo‘lgan xo‘jalik yurituvchi subyektlarga turli iqtisodiy muammolar va kutilmagan zararlar oldini olish maqsadida tavsiyalar e’lon qildi. Bu haqda qo‘mita “Daryo”ga xabar berdi.
Qo‘mita yuqorida qayd etilgan subyektlarga quyidagilarni tavsiya qiladi:
- Qozog‘istondan chorva mollarini (yirik va mayda shoxli mollarni) olib kelish bo‘yicha shartnomalarni imzolash va imzolangan import shartnomalarga muvofiq hamkorlarga to‘lovlarni amalga oshirishni vaqtincha to‘xtatib turish;
- Chorva mollarini (yirik va mayda shoxli mollarni) olib kelish bo‘yicha shartnomaga muvofiq to‘lovlar amalga oshirilgan holatlarda zudlik bilan 2021-yil 15-dekabrga qadar qoramollarni olib kelish choralarini ko‘rish.
Izoh (0)