Buxoroda 2021-yilning mos davriga qadar korrupsiyaga oid 65 ta jinoyat aniqlanib, 76 nafar mansabdor shaxs jinoiy javobgarlikka tortilgani aniq bo‘ldi. Bu haqda “Daryo”ga Bosh prokuratura huzuridagi departamentning Buxoro viloyati boshqarmasi axborot xizmati ma’lum qildi.
“Viloyatda huquqni muhofaza qiluvchi organlar bilan korrupsiya holatlariga qarshi olib borilgan hamkorlikdagi tadbirlar davomida 65 ta jinoyat fosh etildi. Shundan 76 nafar mansabdor shaxs jinoiy javobgarlikka tortildi. Achinarlisi, 2020-yilning mos davrida bu ko‘rsatkich 32 tani tashkil etgandi.
Fosh etilgan korrupsiyaviy jinoyatlarning 5 tasi oliy ta’lim, 5 tasi xalq ta’limi, 2 tasi maktabgacha ta’lim, 9 tasi sog‘liqni saqlash tizimida, 6 tasi kadastr sohasida, 5 tasi ichki ishlar va 4 tasi hokimiyat tizimlarida, 2 tasi bank sohasida va 27 tasi ekologiya, DSENM, bandlik, qurilish va hokazo sohalarda sodir etilgan”, — deyiladi “Daryo”ga berilgan manbada.
Ta’kidlanishicha, noyabr oyining so‘nggi o‘n kunligida fuqaroni o‘qishga kiritib qo‘yish bilan bog‘liq ketma-ket uchta korrupsiyaviy jinoyat fosh etilgan.
“Birinchi holatda buxorolik fuqaro M.A. boshqa bir fuqaro S.J.ni tanishlari yordamida Toshkent moliya institutiga ikkinchi mutaxassislik bo‘yicha o‘qishga kiritib qo‘yish evaziga 1700 dollarni firibgarlik yo‘li bilan olayotgan vaqtda qo‘lga olingan bo‘lsa, keyingi holatda viloyat kasbiy ta’limni rivojlantirish va muvofiqlashtirish hududiy boshqarmasi bo‘lim boshlig‘i M.X. ikki nafar fuqaroni G‘ijduvon va Buxoro tibbiyot kollejlariga o‘qishga kiritish evaziga 1000 dollar olayotgan vaqtda ashyoviy dalillar bilan ushlandi.
Ta’lim tizimidagi uchinchi tezkor tadbir davomida G‘ijduvondagi hamshiralarni tayyorlash bo‘yicha o‘quv kursi rahbari S.R. esa o‘qishga kirish istagi bo‘lgan fuqaro G.R.ni Urganch shahridagi tibbiyot texnikumiga o‘qishga kiritib qo‘yishga va’da berib, undan 1300 dollarni olgan vaqtida qo‘lga olindi.
Barcha holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda”, — deydi boshqarma axborot xizmati rahbari.
Izoh (0)