Қозоғистоннинг Ташқи савдо сиёсати ва халқаро иқтисодий ташкилотларда иштирок этиш масалалари бўйича Идоралараро комиссиясининг қарорига мувофиқ, 2021 йил 15 декабрдан 6 ой муддатга тирик қорамол экспортига тақиқ жорий қилинди. Бу ҳақда «ЭлДала.кз» хабар қилмоқда.
Комиссиянинг йиғилиши 25 ноябрь куни Қозоғистон бош вазирининг биринчи ўринбосари Алихон Исмоилов раислигида бўлиб ўтди.
Унда 15 декабрдан бошлаб Қозоғистон ҳудудидан 6 ой муддатга наслдор молларни олиб чиқишни тўлиқ тақиқлаш тўғрисида қарор қабул қилинди.
Шу муносабат билан Ўзбекистон Ветеринария ва чорвачиликни ривожлантириш давлат қўмитаси фаолияти чорва ҳайвонларини импорт қилиш билан боғлиқ бўлган хўжалик юритувчи субъектларга турли иқтисодий муаммолар ва кутилмаган зарарлар олдини олиш мақсадида тавсиялар эълон қилди. Бу ҳақда қўмита «Дарё»га хабар берди.
Қўмита юқорида қайд этилган субъектларга қуйидагиларни тавсия қилади:
- Қозоғистондан чорва молларини (йирик ва майда шохли молларни) олиб келиш бўйича шартномаларни имзолаш ва имзоланган импорт шартномаларга мувофиқ ҳамкорларга тўловларни амалга оширишни вақтинча тўхтатиб туриш;
- Чорва молларини (йирик ва майда шохли молларни) олиб келиш бўйича шартномага мувофиқ тўловлар амалга оширилган ҳолатларда зудлик билан 2021 йил 15 декабрга қадар қорамолларни олиб келиш чораларини кўриш.
Изоҳ (0)