“Buldozerlar, suv tashuvchi mashinalar va 100 ga yaqin xodimlar jalb etilgan”. Amudaryodagi o‘rmonzorda sodir bo‘lgan katta yong‘in bir necha kunda o‘chirildi

Quyi Amudaryo Davlat biosfera rezervati o‘rmonzorida yuzaga kelgan yong‘in bir necha kundan so‘ng o‘chirildi, deb xabar beradi FVV matbuot xizmati.

Ma’lum qilinishicha, 27-noyabr kuni soat 17:30 da Amudaryo tumani Favqulodda vaziyatlar bo‘limiga quyi Amudaryo Davlat biosfera rezervati o‘rmonzorida (Amudaryo daryosi ikkiga ajralgan va qayta qo‘shilgan joyi oralig‘idagi orolcha) yong‘in sodir bo‘layotgani to‘g‘risida xabar kelib tushgan.

Yong‘in-qutqaruv ekipajlari soat 19:10 da yong‘inni o‘chirish ishlariga kirishgan (tuman yong‘in-qutqaruv qismidan yong‘in sodir bo‘lgan joygacha masofa taxminan 47 kilometrni tashkil etadi). 28-noyabr kuni soat 05:15 da yong‘in qurshab olinib, 08:04 da o‘chirilgan.

Yong‘in sodir bo‘lgan joyda qayta yong‘in o‘choqlari paydo bo‘lishining oldini olish maqsadida voqea joyiga 5 ta yong‘in-qutqaruv ekipaji, Mintaqaviy qutqaruv otryadidan 1 ta bo‘linma va yordamchi texnikalar, 2 ta buldozer, 2 ta “pogruzchik”, 2 ta suv tashuvchi mashina jalb etilgan. Shuningdek, Qoraqalpog‘iston Respublikasi FVBdan 50 nafar, O‘rmon xo‘jaligidan 20 nafar, Qoraqalpog‘iston Ekologiya va atrof muhitni muhofaza qilish qo‘mitasidan 5 nafar, tuman Obodonlashtirish bo‘limidan 20 nafar, jami 95 nafar xodim jalb etilib, ofatga qarshi kurashish uchun joyida qoldirilgan va 3 guruhga bo‘lingan holda kecha-yu kunduz navbatchilik yo‘lga qo‘yilgan.

Kutilmaganda yong‘in qoldiqlari qayta alanga olgan va 29-noyabr kuni soat 10:25 lar atrofida o‘chirishga kirishilib, 30-noyabr kuni soat 03:30 da o‘chirishga erishilgan.

Ta’kidlanishicha, yong‘indan jabrlangan va halok bo‘lganlar yo‘q. “Nazarxan” ovul fuqarolar yig‘inidan yong‘in sodir bo‘lgan joygacha masofa taxminan 8 kilometrni tashkil etadi.

Hozirda keltirilgan zarar miqdori aniqlanmoqda, voqea joyida hamkor vazirlik, idora va xizmatlar kuch-vositalari navbatchilik olib bormoqda.

Eslatib o‘tamiz, Jizzax viloyatining Zomin tumani “Duoba” qishloq fuqarolar yig‘ini O‘riklisoy qishlog‘i yaqinidagi o‘rmon hududlarida 1-avgust kuni yirik yong‘in yuz bergandi. Soat taxminan 10:40 da boshlangan yong‘in salkam sakkiz soatdan so‘ng o‘chirilgan. FVV ma’lumotlariga ko‘ra, 80 gektar maydonda quruq o‘t va daraxtlar yongan. Olovni o‘chirishga 1600 ga yaqin odam jalb etilgan.

2-avgust kuni ushbu hududda yana yong‘in sodir bo‘lgani haqida xabarlar tarqaldi. Ammo Jizzax viloyati Favqulodda vaziyatlar boshqarmasi buni rad etib, hududda yong‘indan keyingi tozalash ishlari amalga oshirilayotgani, vaziyat to‘liq nazorat ostida ekanligini ma’lum qildi.