Ijtimoiy tarmoqlarda koronavirusga qarshi emlanmagan fuqaroga vaksina olganlik to‘g‘risida SMS-xabarnoma kelgani haqida video tarqaldi. Unda murojaat egasi “Siz bugun vaksina oldingiz, keyingi vaksinangiz dekabr oyida”, degan mazmunda xabarnoma olganini aytib, O‘zbekistonda emlangan aholining umumiy statistikasi oshirib ko‘rsatilayotgan bo‘lishi mumkinligini bildirgan. Mazkur holatga sog‘liqni saqlash vaziri o‘rinbosari Abdulla Azizov izoh berdi.
“Ushbu holatga izoh berishdan avval shuni aytmoqchimanki, Sog‘liqni saqlash vazirligi COVID-19 ga qarshi emlanish statistikasi sun’iy oshirilishidan hech qanday manfaatdor emas. Aksincha, har bir fuqaro emlash jarayonlarida faol ishtirok etib, bu orqali mamlakatimizdagi epidemik vaziyatning barqaror bo‘lishi tarafdoridir”, — deya uning so‘zlarini keltirgan SSV matbuot xizmati.
Abdulla Azizovning ta’kidlashicha, shu nuqtayi nazardan, yuqoridagi videomurojaat egasining vaksina olgan aholining umumiy statistikasiga ishonchsizlik bildirishiga asos yo‘q.
“To‘g‘ri, ayni paytda fuqarolarimizda ‘Koronavirusga qarshi emlanganlik to‘g‘risidagi sertifikatni qayerdan va qanday olish mumkin?’, ‘Qaysi vaksinadan so‘ng organizmda kuchli immunitet hosil bo‘ladi?’ kabi savollar bilan birga, emlanganlik haqidagi SMS-xabarnomalar yuzasidan ba’zi tushunmovchiliklar yuzaga kelmoqda.
Jumladan, yuqoridagi holat kabi bugun ayrim fuqarolarning qo‘l telefoniga koronavirusga qarshi vaksina olganlik haqida noto‘g‘ri SMS-xabarnoma yuborilmoqda. Aslida esa o‘sha fuqaro umuman emlanmagan bo‘lib chiqyapti. Bu bir qarashda biroz tushunarsiz holat bo‘lishi mumkin, biroq ushbu jarayonlarda inson omili ishtirok etishini hisobga olsak, xatoliklar yuzaga kelishi mumkin.
Ya’ni, hozirda emlanayotgan aholining shaxsiy ma’lumotlarini elektron tizimga kiritayotgan tibbiyot xodimi katta hajmdagi axborot bilan ishlashiga to‘g‘ri kelmoqda. Qolaversa, ba’zi emlash punktlarida ma’lumotlar qog‘oz jurnallarga kiritilayotgani bois, mas’ul xodimning xato qilish ehtimoli yo‘q emas”, — degan u.
Abdulla Azizovning ma’lum qilishicha, bunday holatlarning oldini olish uchun ITMed mobil ilovasi va telegramdagi @itmeduz_bot sahifasida JSh ShIR (jismoniy shaxslarning shaxsiy identifikatsion raqami) hamda my.gov.uz portali orqali JSh ShIR va pasport ma’lumotlaridan foydalangan holda fuqarolarga vaksina olish uchun elektron navbatga yozilish va emlanganlik sertifikatini yuklab olish imkoniyati yaratilgan bo‘lib, bu har tomonlama ishonchli va xavfsizdir.
“Agar vaksina oluvchi fuqaroda bunday imkoniyat bo‘lmasa, o‘zining shaxsiy ma’lumotlari va telefon raqamini emlash hamshirasiga to‘g‘ri aytganiga ishonch hosil qilishi kerak. Ana shunda yuqoridagi kabi tushunmovchiliklar yuzaga kelmaydi”, — degan sog‘liqni saqlash vaziri o‘rinbosari.
Vazirlik ma’lumotiga ko‘ra, 30-oktabrga kelib O‘zbekistonda jami 33 672 515 doza vaksinadan foydalanildi. Ulardan 1-bosqich emlanganlar 17 487 499 nafarni, 2-bosqichda emlanganlar 10 688 905 nafarni, 3-bosqich emlanganlar 5 496 111 nafarni tashkil qildi. Birinchi doza bilan emlanish ko‘rsatkichi emlanishi rejalashtirilgan qatlamga nisbatan 81,5 foizni tashkil qilmoqda.
Mavzuga doir:
Izoh (0)