Швеция бир палатали парламенти (Риксдаг) Швеция Социал-демократик ишчи партияси раҳбари Магдалена Андерссонни яна бош вазир этиб сайлади. Сиёсатчи бир ҳафтадан камроқ вақт ичида иккинчи марта ушбу лавозимни эгаллади. Ўтган сафар у сайланганидан сўнг 7 соат ўтиб истеъфога чиққанди. Андерссон хоним — Швеция ҳукуматини бошқарадиган биринчи аёл.
Андерссоннинг номзодини тасдиқлаш учун камида 175 киши унга хайрихоҳ овоз бериши ёки бетараф қолиши керак эди. Унинг номзодини 101 депутат қўллаб-қувватлади, 173 киши қарши овоз берди, яна 75 депутат бетараф қолди.
Магдалена Андерссон илк бор 24 ноябрь куни бош вазир этиб сайланган эди, бироқ у Яшиллар партиясининг ҳукуматдан чиқиш тўғрисидаги қарори ортидан Вазирлар Маҳкамасида бўлиниш юз бергани туфайли етти соатдан кейин ўз лавозимини тарк этган. Яшиллар Швеция ҳукуматининг бюджет лойиҳаси озчилик ҳукуматдан эмас, балки мухолиф партиялардан тасдиқлангани муносабати билан ҳукмрон коалициядан чиққан.
Эслатиб ўтамиз, Андеррсон 10 ноябрь куни Швеция бош вазири лавозимидан озод этилган Стефан Лёвеннинг ўрнини эгаллаган эди. Лёвен 2012 йилдан 2021 йилгача Швеция Социал-демократик партияси раҳбари бўлган. Унинг қўл остида партия 2014- ва 2018 йиллардаги иккита сайловда ғалаба қозонган. Бироқ сўнгги пайтларда партиянинг позицияси тушиб кетди, бу Швеция фуқаролари ўртасида ўтказилган сўров натижаларида ҳам ўз аксини топди. Август ойида бош вазир 2022 йилги сайловлар олдидан партияга янги раҳбар кераклигини айтган.
Магдалена Андерссон 2014 йилда Швеция молия вазири лавозимини эгаллаб, ҳукуматда мазкур вазифа юклатилган биринчи аёл бўлган.
Мавзуга доир:
Изоҳ (0)