Shavkat Mirziyoyev Shayxontohurdagi Markaziy ko‘p tarmoqli poliklinikani borib ko‘rdi

Shavkat Mirziyoyev Shayxontohur tumanidagi Markaziy ko‘p tarmoqli poliklinikani borib ko‘rdi, deya xabar qilmoqda Prezident matbuot xizmati.

Ta’kidlanishicha, bu shifo maskani 1994-yilda qurilgan, 2017-yilda rekonstruksiya qilingan. Bu yerda terapiya, nevrologiya, kardiologiya, revmatologiya, allergologiya, pediatriya, jarrohlik kabi bo‘limlar, tashxis uskunalari mavjud.

Ushbu markaziy poliklinika va uning tarkibidagi 9 ta oilaviy poliklinika tumanning 51 ta mahallasida yashovchi 346 ming nafar aholiga xizmat ko‘rsatmoqda.

Prezident ushbu poliklinikalar negizida tibbiyot klasteri tashkil etish bo‘yicha ko‘rsatma berdi.

“Zamon talabi shunday: xususiy tibbiyot rivojlanib boraveradi. Aholining bir qismi xususiy klinikalarga boradi. Lekin davlat barcha aholini sifatli tibbiyot bilan qamrab olishi kerak. Shuning uchun bu yerni klasterga aylantirib, davolashni manzilli yo‘lga qo‘yish, samaradorligi va qamrovini oshirish zarur. Odamlar tibbiyotda adolatni sezishi kerak”, – dedi Prezident.

Mutasaddilarga bu borada topshiriqlar berildi.

Shavkat Mirziyoyev Shayxontohur tumani “Olim Xo‘jayev” nomidagi mahallada ham bo‘ldi. Bu yerda o‘tgan asrning 60-yillarida qurilgan ikki qavatli uylarni renovatsiya dasturi asosida yangilash rejalashtirilgan.

Davlat rahbariga bu boradagi loyiha haqida ma’lumot berildi. Prezident mahalladagi nuroniylar, xonadon egalari bilan suhbatlashdi.