Shavkat Mirziyoyev Toshkentdagi “Sarhumdon” va “Gulobod” mahallasiga borib, aholi bilan muloqot qildi

Prezident Shavkat Mirziyoyev 23-noyabr kuni Toshkent shahrining Shayxontohur tumanidagi “Sarhumdon” mahallasiga bordi.

Qayd etilishicha, “Sarhumdon” mahallasining ichki yo‘llari, maydonchalar obod qilingan. Yaqinda bu yerda yangi mahalla guzari qurildi. Savdo va maishiy xizmat shoxobchalari, bolalar o‘yingohi, harbiy vatanparvarlik maydonchasi tashkil etildi.

Mahallada 6 ming 500 nafardan ortiq aholi yashaydi. Bu yerda 45 ta ko‘p qavatli uy, maktabgacha ta’lim muassasasi va xususiy maktab bor. O‘ndan ortiq kichik biznes korxonasida mahalliy yoshlar va ayollar ishlamoqda.

Prezident mahalladagi sharoitlarni ko‘rdi. Harbiy vatanparvarlik maydonchasi bilan tanishuv chog‘ida bu yerga askar va sportchilarni jalb etib, yoshlarni milliy g‘urur va mardlik ruhida tarbiyalash yuzasidan tavsiyalar berildi.

Mahallada “Yashil makon” loyihasi doirasida ko‘chatlar ekilib, mo‘jaz bog‘ barpo etilgan. Shavkat Mirziyoyev mahalla oqsoqollari bilan birga ushbu bog‘ga ko‘chatlar o‘tqazdi. Nuroniylar yurtimizga hamisha tinchlik, xalqimizga farovonlik tilab duo qildi.

Davlat rahbari kutilmaganda “Gulobod” mahallasiga ham o‘tib, mavjud holatni ko‘zdan kechirdi, odamlar bilan suhbatlashdi.

93 yoshli Anvarxo‘ja ota Prezidentni duo qildi. Mahalladagi o‘zgarishlarni ta’kidlab, otalar choyxonasi qurib berishni so‘radi. Shavkat Mirziyoyev bu taklifni qo‘llab-quvvatlab, otaxonga mustahkam sog‘lik tiladi.

“Gulobod” mahallasida Shayxontohur tumani Bolalar va o‘smirlar sport maktabi hamda 41-umumta’lim maktabi joylashgan. Prezident mazkur maktablarni ham kirib ko‘rdi, o‘qituvchilar bilan gaplashdi.

“Ko‘ryapsizlar, ta’lim bilan muallimga sharoit yaratishga harakat qilyapmiz. Bugun bu yerga kelib, o‘zimga ko‘p xulosa qildim. Bu maktab binosini ham yangilaymiz. Fanlar uchun, sport uchun yaxshi sharoitlar bo‘ladi. Bugun bir tarixiy kun bo‘lib qoladi”, – dedi Shavkat Mirziyoyev.

Davlat rahbari mahallalar aholisi bilan muloqot qildi.