O‘zbekiston Qishloq xo‘jaligi vazirligi delegatsiyasi Angliyaning Glostershir grafligidagi Sayrensester shahrida joylashgan Qirollik qishloq xo‘jaligi universiteti (Royal Agricultural University, RAU)da muzokaralar o‘tkazdi.
Vazirlik matbuot xizmati xabariga ko‘ra, tashrif O‘zbekistonda tashkil etilayotgan Xalqaro qishloq xo‘jaligi universiteti uchun ta’lim dasturlari va boshqa masalalarni ishlab chiqish maqsadida amalga oshirilgan.
Delegatsiyaga Toshkent davlat agrar universiteti rektori maslahatchisi professor Munira Aminova boshchilik qildi. Safar davomida Qishloq xo‘jaligi vazirligi mutaxassislari RAU prorektori o‘rinbosari, professor Nil Ravenskroft, RAU Qishloq xo‘jaligi maktabi rahbari Filip Xadson va tadqiqot direktori, professor Mark Xorton bilan uchrashgan.
Delegatsiya universitet talabalari, o‘qituvchilari va boshqa xodimlari bilan uchrashgan, talabalar shaharchasi va universitet xo‘jaligining Farm491 agrotexnologik inkubatorida bo‘lgan. Delegatsiyaga yangi virtual o‘quv muhiti va RAU talabalarining hamkor universitetlar bilan, xususan, Xitoyda o‘qitishda muvaffaqiyatli qo‘llanilgan boshqa innovatsiyalari ko‘rsatilgan.
RAU — Buyuk Britaniyadagi eng ko‘hna qishloq xo‘jaligi universiteti bo‘lib, 1845-yilda tashkil etilgan. Mazkur universitet va O‘zbekiston tomoni o‘rtasidagi hamkorlik bo‘yicha muzokaralar 2021-yil boshida boshlangan edi.
Yozda O‘zbekiston Qishloq xo‘jaligi vazirligi, RAU va Litvaning Buyuk Vitovt universiteti (Vytautas Magnus University, VDU) o‘rtasida uch tomonlama o‘zaro anglashuv va hamkorlik memorandumi imzolangan bo‘lib, unga asosan xalqaro universitetni tashkil etish va faoliyatini yo‘lga qo‘yish bo‘yicha muzokaralar olib borilmoqda.
Memorandumda universitetlar o‘rtasida o‘qituvchi va talabalar almashinuvini yo‘lga qo‘yish hamda fermerlar va fermer xo‘jaliklari maslahatchilarining malakasini oshirish va almashish dasturlarini amalga oshirish, loyiha va dasturlar ishlab chiqish, qo‘shma ilmiy tadqiqotlarni o‘tkazish ko‘zda tutilgan.
Izoh (0)