Шавкат Мирзиёев Шайхонтоҳур туманидаги Марказий кўп тармоқли поликлиникани бориб кўрди, дея хабар қилмоқда Президент матбуот хизмати.
Таъкидланишича, бу шифо маскани 1994 йилда қурилган, 2017 йилда реконструкция қилинган. Бу ерда терапия, неврология, кардиология, ревматология, аллергология, педиатрия, жарроҳлик каби бўлимлар, ташхис ускуналари мавжуд.
Ушбу марказий поликлиника ва унинг таркибидаги 9 та оилавий поликлиника туманнинг 51 та маҳалласида яшовчи 346 минг нафар аҳолига хизмат кўрсатмоқда.
Президент ушбу поликлиникалар негизида тиббиёт кластери ташкил этиш бўйича кўрсатма берди.
«Замон талаби шундай: хусусий тиббиёт ривожланиб бораверади. Аҳолининг бир қисми хусусий клиникаларга боради. Лекин давлат барча аҳолини сифатли тиббиёт билан қамраб олиши керак. Шунинг учун бу ерни кластерга айлантириб, даволашни манзилли йўлга қўйиш, самарадорлиги ва қамровини ошириш зарур. Одамлар тиббиётда адолатни сезиши керак», – деди Президент.
Мутасаддиларга бу борада топшириқлар берилди.
Шавкат Мирзиёев Шайхонтоҳур тумани «Олим Хўжаев» номидаги маҳаллада ҳам бўлди. Бу ерда ўтган асрнинг 60 йилларида қурилган икки қаватли уйларни реновация дастури асосида янгилаш режалаштирилган.
Давлат раҳбарига бу борадаги лойиҳа ҳақида маълумот берилди. Президент маҳалладаги нуронийлар, хонадон эгалари билан суҳбатлашди.
Мавзуга доир:
- Видео: Шайхонтоҳур туманидаги маҳаллаларнинг шароитлари билан танишаётган Шавкат Мирзиёев
- «Ҳозир одамлар ‘Нима бўларкан энди?’ деб кутяпти» – Шавкат Мирзиёев Шайхонтоҳурга ташрифи доирасида ўқитувчилар билан суҳбатлашди
- «Тошкентда шундай бўлса, Қорақалпоғистонда қандай?» — Шавкат Мирзиёев мактаб ошхоналари ҳақида
Изоҳ (0)