“Toshkentda shunday bo‘lsa, Qoraqalpog‘istonda qanday?” — Shavkat Mirziyoyev maktab oshxonalari haqida

Shavkat Mirziyoyev Shayxontohur tumani Gulobod mavzesiga tashrifi davomida 41-maktabga kirdi.

Prezident sport zaliga kirib, jismoniy tarbiya darsidagi bolalar va o‘qituvchilar bilan gaplashdi. Maktab oshxonasi, menyusini ko‘rdi va birma-bir surishtirdi.

“Bular endi imkoni yetgancha masalliq olib kelib, tayyorlashadi. Toshkentda shunday bo‘lsa, Qoraqalpog‘istonda qanday? Maktab oshxonalarining ichiga hali kirmadik. Sifati, muddati qanday, narxi — bularni tizimga solish bo‘yicha ish olib bormadik. 10-yanvarga qadar maktablar oshxonalariga sifatli, to‘yimli, balanslashtirilgan taomnoma bo‘lishi uchun ketring xizmatini autsorsing asosida tashkil qilish bo‘yicha puxta loyiha qilinglar”, — dedi Prezident.

Shuningdek, maktab 2 smenali bo‘lishi uchun yangi korpus qurish bo‘yicha topshiriq berildi.