Lukashenko Putin Navalniy bilan muzokara stoliga o‘tirsa u ham muxolifat bilan muloqotni boshlashga va’da berdi

Belarus prezidenti Aleksandr Lukashenko Rossiya prezidenti Vladimir Putin uni muxolifat bilan muloqot qilishga chaqirgani haqidagi xabarlarga javoban “Putin Navalniy bilan muzokaralar stoliga o‘tirishi bilanoq” u ham shunday qilishini aytdi.

“Vladimir Putin bu maslahatni kimga berganini bilmayman. Menga hech narsani maslahat bergani yo‘q. Men u bilan bir soatdan ko‘proq gaplashdim va bu masalalarning birortasi bo‘yicha undan hech qanday maslahat eshitmadim”, — dedi Lukashenko BBC jurnalisti Stiven Rozenbergga bergan intervyusida. Video BBC kanalida chop etilgan.

“Men parallel o‘tkazishim mumkin – Putin va Navalniy muzokaralar stoliga o‘tirgan zahotiyoq men ham Svetlana (Tixanovskaya) bilan muzokaralarni boshlayman”, — dedi prezident.

Putin Navalniy bilan muzokara stoliga o‘tirishini istaysizmi, degan savolga Lukashenko bunday “istaklar o‘yini”ni o‘ynamasligini aytdi. “Bu uning (Putin) muammolari. Men bunday istaklar o‘yinini o‘ynamayman. Agar mening fikrimni bilmoqchi bo‘lsangiz, men uchun Navalniy korrupsioner. Putin esa hech qachon u bilan muzokara stoliga o‘tirmaydi. Putin uchun u muxolifatchi emas, Rossiya manfaatlariga xiyonat qilgan sotqin”, — dedi Belarus davlati rahbari.

Xabarlarga ko‘ra, 18-noyabr kuni Rossiya prezidenti Belarus rahbariyatini muxolifat bilan muloqotga kirishishga chaqirgan. “Ha, biz Belarusdagi vaziyat mamlakat ichida tinchlanganini bilamiz, lekin shunga qaramay, muammolar bor, biz buni juda yaxshi bilamiz va, albatta, hukumat va muxolifatni muloqotga chaqiramiz”, — degan Putin.

Svetlana Tixanovskaya 2020-yil avgust oyida Belarusda bo‘lib o‘tgan prezidentlik saylovlarida Aleksandr Lukashenkoning asosiy raqibi bo‘lgan. Markaziy saylov komissiyasi Lukashenkoning g‘alabasini e’lon qilgandan so‘ng, mamlakatda ommaviy noroziliklar boshlandi, namoyishlar birinchi kunlari hukumat tomonidan shafqatsizlarcha bostirildi. Saylov natijalarini tan olmagan Tixanovskaya hukumat bosimi ostida chet elga ketishga majbur bo‘ldi.

Yevropa Ittifoqining qator davlatlari Tixanovskayani Belarusdagi muxolif kuchlar yetakchisi sifatida tan oladi. Aprel oyi boshida Belarus Davlat xavfsizlik qo‘mitasi Tixanovskayani terrorchilik faoliyatiga aloqador tashkilotlar va shaxslar ro‘yxatiga kiritgan.