Лукашенко Путин Навальний билан музокара столига ўтирса у ҳам мухолифат билан мулоқотни бошлашга ваъда берди

Беларусь президенти Александр Лукашенко Россия президенти Владимир Путин уни мухолифат билан мулоқот қилишга чақиргани ҳақидаги хабарларга жавобан «Путин Навальний билан музокаралар столига ўтириши биланоқ» у ҳам шундай қилишини айтди.

«Владимир Путин бу маслаҳатни кимга берганини билмайман. Менга ҳеч нарсани маслаҳат бергани йўқ. Мен у билан бир соатдан кўпроқ гаплашдим ва бу масалаларнинг бирортаси бўйича ундан ҳеч қандай маслаҳат эшитмадим», — деди Лукашенко BBC журналисти Стивен Розенбергга берган интервьюсида. Видео BBC каналида чоп этилган.

«Мен параллел ўтказишим мумкин – Путин ва Навальний музокаралар столига ўтирган заҳотиёқ мен ҳам Светлана (Тихановская) билан музокараларни бошлайман», — деди президент.

Путин Навальний билан музокара столига ўтиришини истайсизми, деган саволга Лукашенко бундай «истаклар ўйини»ни ўйнамаслигини айтди. «Бу унинг (Путин) муаммолари. Мен бундай истаклар ўйинини ўйнамайман. Агар менинг фикримни билмоқчи бўлсангиз, мен учун Навальний коррупционэр. Путин эса ҳеч қачон у билан музокара столига ўтирмайди. Путин учун у мухолифатчи эмас, Россия манфаатларига хиёнат қилган сотқин», — деди Беларусь давлати раҳбари.

Хабарларга кўра, 18 ноябрь куни Россия президенти Беларусь раҳбариятини мухолифат билан мулоқотга киришишга чақирган. «Ҳа, биз Беларусдаги вазият мамлакат ичида тинчланганини биламиз, лекин шунга қарамай, муаммолар бор, биз буни жуда яхши биламиз ва, албатта, ҳукумат ва мухолифатни мулоқотга чақирамиз», — деган Путин.

Светлана Тихановская 2020 йил август ойида Беларусда бўлиб ўтган президентлик сайловларида Александр Лукашенконинг асосий рақиби бўлган. Марказий сайлов комиссияси Лукашенконинг ғалабасини эълон қилгандан сўнг, мамлакатда оммавий норозиликлар бошланди, намойишлар биринчи кунлари ҳукумат томонидан шафқатсизларча бостирилди. Сайлов натижаларини тан олмаган Тихановская ҳукумат босими остида чет элга кетишга мажбур бўлди.

Европа Иттифоқининг қатор давлатлари Тихановскаяни Беларусдаги мухолиф кучлар етакчиси сифатида тан олади. Апрель ойи бошида Беларусь Давлат хавфсизлик қўмитаси Тихановскаяни террорчилик фаолиятига алоқадор ташкилотлар ва шахслар рўйхатига киритган.