Yevropada agar shoshilinch cheklov choralari ko‘rilmasa, 2022-yilning mart oyigacha koronavirusdan yana 500 mingta o‘lim qayd etilishi mumkin. Bu haqda Jahon sog‘liqni saqlash tashkiloti (JSST) ning Yevropa byurosi direktori Xans Klyuge BBC’ga ma’lum qildi.
JSST koronavirus tarqalishi ortib borayotganidan “juda xavotirda”, dedi Kluge. U himoya niqoblari taqishni davom ettirish, vaksinatsiya tezligini oshirish, asosiy sog‘liqni saqlash choralariga rioya qilish va muolajaning yangi usullarini joriy etishga chaqirdi.
Xans Kluge koronavirusga qarshi majburiy emlashni so‘nggi chora sifatida ko‘rish kerakligini aytdi, lekin, uning so‘zlariga ko‘ra, bu masala bo‘yicha muhokama o‘tkazishning “ayni vaqti”.
So‘nggi kunlarda bir qator Yevropa mamlakatlari hukumati COVID-19 bilan kasallanish ko‘paygani sababli karantin cheklovlarini kuchaytirdi. Xususan, Avstriyada 22-noyabrdan umumiy lokdaun boshlanishi e’lon qilindi, mamlakat hukumati Yevropada birinchi bo‘lib koronavirusga qarshi majburiy vaksinatsiya joriy qilmoqchi. Chexiya va Slovakiyada emlanmagan odamlarga yangi cheklovlar kiritilgan.
Jons Hopkins universiteti ma’lumotlariga ko‘ra, butun dunyoda COVID-19 yuqtirganlar soni 257 228 299 kishiga yetgan, shularning 5 148 134 nafari vafot etgan. Shuningdek, butun dunyoda koronavirusga qarshi 7,3 milliard doza vaksina qo‘llanilgan.
Izoh (0)