Европада агар шошилинч чеклов чоралари кўрилмаса, 2022 йилнинг март ойигача коронавирусдан яна 500 мингта ўлим қайд этилиши мумкин. Бу ҳақда Жаҳон соғлиқни сақлаш ташкилоти (ЖССТ) нинг Европа бюроси директори Ханс Клюге BBC’га маълум қилди.
ЖССТ коронавирус тарқалиши ортиб бораётганидан «жуда хавотирда», деди Клуге. У ҳимоя ниқоблари тақишни давом эттириш, вакцинация тезлигини ошириш, асосий соғлиқни сақлаш чораларига риоя қилиш ва муолажанинг янги усулларини жорий этишга чақирди.
Ханс Клуге коронавирусга қарши мажбурий эмлашни сўнгги чора сифатида кўриш кераклигини айтди, лекин, унинг сўзларига кўра, бу масала бўйича муҳокама ўтказишнинг «айни вақти».
Сўнгги кунларда бир қатор Европа мамлакатлари ҳукумати COVID-19 билан касалланиш кўпайгани сабабли карантин чекловларини кучайтирди. Хусусан, Австрияда 22 ноябрдан умумий локдаун бошланиши эълон қилинди, мамлакат ҳукумати Европада биринчи бўлиб коронавирусга қарши мажбурий вакцинация жорий қилмоқчи. Чехия ва Словакияда эмланмаган одамларга янги чекловлар киритилган.
Жонс Ҳопкинс университети маълумотларига кўра, бутун дунёда COVID-19 юқтирганлар сони 257 228 299 кишига етган, шуларнинг 5 148 134 нафари вафот этган. Шунингдек, бутун дунёда коронавирусга қарши 7,3 миллиард доза вакцина қўлланилган.
Изоҳ (0)