O‘zbekistonda oktabr oyida ko‘chmas mulk oldi-sotdisi bo‘yicha tuzilgan shartnomalar soni sentabr oyiga nisbatan 11,7 foizga oshdi. Bu haqda ko‘chmas mulk bozoridagi talab o‘zgarishlarni doimiy ravishda tahlil qilib kelayotgan Iqtisodiy tadqiqotlar va islohotlar markazi ma’lumotlarida keltirilgan.
Unda qayd etilishicha, oktabr oyida barcha hududlarda o‘sish kuzatildi. Eng yuqori o‘sish sur’atlari Andijon (30,5 foiz), Xorazm (25,4 foiz), Navoiy (22,2 foiz) viloyatlarida, eng past ko‘rsatkich esa Surxondaryo (5,7 foiz), Toshkent (8,4 foiz) viloyatlarida va Toshkent (7,5 foiz) shahrida kuzatildi.
Ko‘chmas mulk bozorida 2021-yilning oktabrdagi o‘sish nafaqat sentabr oyiga nisbatan, balki 2020-yilning mos davri, shuningdek, pandemiyadan oldingi darajasidan ham yuqori bo‘ldi. 2020-yilning mos davriga (19,7 ming) nisbatan o‘sish 9,5 foizni, 2019-yilning oktabr oyiga nisbatan esa 36,7 foizni tashkil etgan.
Tahlilchilarning fikricha, ko‘chmas mulk bozorida bitimlar soni oshishining asosiy sabablari bu respublikada pandemiya inqirozi ta’siridan aziyat chekkan aholining sotib olish qobiliyatini tiklanishidir. O‘zbekiston inqirozdan chiqmoqda, aholining daromad darajasi barqarorlashmoqda va o‘sishda davom etmoqda.
Markaz, shuningdek, hududlarda ko‘chmas mulkka bo‘lgan talabning oshishi yig‘im-terim mavsumining tugagani va qishloq xo‘jaligi ishlab chiqaruvchilarining o‘z mahsulotlaridan daromad olishi bilan ham bog‘liqligini qayd etgan.
Avvalroq O‘zbekistonda 2021-yilning uchinchi choragida ikkilamchi ko‘chmas mulk bozoridagi narxlar o‘tgan chorakka nisbatan 2,3 foizga oshgani haqida xabar berilgan edi.
Izoh (0)