O‘zbekistonda 2021-yilning yanvar—oktabr oylarida 902,7 ming tonna avtomobil benzini ishlab chiqarildi. Bu haqda Statistika qo‘mitasi xabar qildi.
Ma’lum bo‘lishicha, benzin ishlab chiqarish hajmi oylar kesimida quyidagicha:
- yanvar – 93,9 ming tonna;
- fevral – 91,4 ming tonna;
- mart – 106 ming tonna;
- aprel – 77,3 ming tonna;
- may – 87,6 ming tonna;
- iyun – 90,3 ming tonna;
- iyul – 85,7 ming tonna;
- avgust – 97,2 ming tonna;
- sentabr – 85,9 ming tonna;
- oktabr – 87,5 ming tonna.
Shuningdek, O‘zbekistonda benzin import qilish hajmi 3,2 barobarga oshib, 2021-yilning to‘qqiz oyi davomida 104 million dollarlik benzin import qilingan.
Respublika tovar-xomashyo birjasi O‘zbekistonda 2021-yil boshidan buyon avtomobil benzini segmentida narxlarning o‘sishiga oid ma’lumotlarini e’lon qilgandi. Unga ko‘ra, Ai-80 benzini narxi o‘rtacha 63,2 foizga o‘sgan. Keyinchalik O‘zbekistonda 2022-yildan boshlab Ai-80 benzinidan bosqichma-bosqich voz kechish rejalashtirilayotgani xabar qilindi. Noyabr oyining ikkinchi yarmiga kelib birja savdolarida Ai-80 markali benzin narxi tushishni boshladi. 15-noyabrga nisbatan 17-noyabr kuni Ai-80 markali avtomobil benzinining o‘rtacha sotilish narxlari 1 tonnasi 10 million 129 ming so‘mdan 9 million 365 ming 500 so‘mgacha, 18-noyabr kuni esa 9 million 180 ming 500 so‘mga pasayib 9 foizga arzonlashgan.
Bundan tashqari, Ijtimoiy tarmoqlarda O‘zbekistonda Ai-91 benzinining narxi qimmatlashgani va sifati pastligi haqida turli xabarlar paydo bo‘la boshladi. Energetika vazirligi 1 litr Ai-91 benzini narxi 8100 so‘mga chiqqaniga munosabat bildirib, mamlakatdagi benzin narxi bozor iqtisodiyoti tamoyillari hamda jahon kotirovkalariga bog‘langanini ma’lum qilgan. Shuningdek, jurnalist va blogerlar Toshkent shahridagi turli AYoQShlarda sotilayotgan benzin sifati va narxi bo‘yicha jamoatchilik nazoratini olib borgan.
Izoh (0)