O‘zbekistonda pensiya va nafaqa oluvchilar soni 4 million kishidan oshdi. Bu haqda Moliya vazirligi huzuridagi budjetdan tashqari Pensiya jamg‘armasi ma’lum qildi.
2021-yil 1-noyabr holatiga ko‘ra Pensiya jamg‘armasining hududiy tuman (shahar) bo‘limlarida hisobga olingan pensiya va nafaqa oluvchilarning umumiy soni 1-yanvar holatiga nisbatan 178,6 ming nafar (4,7 foiz)ga oshib, 4 003,8 ming nafarni tashkil qilgan.
Shundan:
- 2 966,7 ming nafari (74,1 foizi) yoshga doir pensiya (64 foizi ayollar);
- 397,6 ming nafari (9,9 foizi) nogironlik pensiya (41,1 foizi ayollar);
- 198,6 ming nafari (5 foizi) boquvchisini yo‘qotganlik pensiya oluvchi oilalar;
- 440,8 ming nafari (11 foizi) nafaqa oluvchilar (47,3 foizi ayollar).
2021 yilning yanvar—oktabr oylarida 327,5 ming nafar fuqaroga yangi pensiya va nafaqalar tayinlangan. Shundan, 215,1 ming nafariga yoshga doir pensiya, 29,9 ming nafariga nogiron shaxs sifatida pensiya, 19,6 ming oilaga boquvchisini yo‘qotganlik pensiya va 62,9 ming nafariga nafaqalar tayinlandi.
Qayd etilishicha, bu 2020-yilning mos davriga nisbatan 57,9 ming nafar yoki 21,5 foizga ko‘p.
Izoh (0)