Ўзбекистонда октябрь ойида кўчмас мулк олди-сотдиси бўйича тузилган шартномалар сони сентябрь ойига нисбатан 11,7 фоизга ошди. Бу ҳақда кўчмас мулк бозоридаги талаб ўзгаришларни доимий равишда таҳлил қилиб келаётган Иқтисодий тадқиқотлар ва ислоҳотлар маркази маълумотларида келтирилган.
Унда қайд этилишича, октябрь ойида барча ҳудудларда ўсиш кузатилди. Энг юқори ўсиш суръатлари Андижон (30,5 фоиз), Хоразм (25,4 фоиз), Навоий (22,2 фоиз) вилоятларида, энг паст кўрсаткич эса Сурхондарё (5,7 фоиз), Тошкент (8,4 фоиз) вилоятларида ва Тошкент (7,5 фоиз) шаҳрида кузатилди.
Кўчмас мулк бозорида 2021 йилнинг октябрдаги ўсиш нафақат сентябрь ойига нисбатан, балки 2020 йилнинг мос даври, шунингдек, пандемиядан олдинги даражасидан ҳам юқори бўлди. 2020 йилнинг мос даврига (19,7 минг) нисбатан ўсиш 9,5 фоизни, 2019 йилнинг октябрь ойига нисбатан эса 36,7 фоизни ташкил этган.
Таҳлилчиларнинг фикрича, кўчмас мулк бозорида битимлар сони ошишининг асосий сабаблари бу республикада пандемия инқирози таъсиридан азият чеккан аҳолининг сотиб олиш қобилиятини тикланишидир. Ўзбекистон инқироздан чиқмоқда, аҳолининг даромад даражаси барқарорлашмоқда ва ўсишда давом этмоқда.
Марказ, шунингдек, ҳудудларда кўчмас мулкка бўлган талабнинг ошиши йиғим-терим мавсумининг тугагани ва қишлоқ хўжалиги ишлаб чиқарувчиларининг ўз маҳсулотларидан даромад олиши билан ҳам боғлиқлигини қайд этган.
Аввалроқ Ўзбекистонда 2021 йилнинг учинчи чорагида иккиламчи кўчмас мулк бозоридаги нархлар ўтган чоракка нисбатан 2,3 фоизга ошгани ҳақида хабар берилган эди.
Изоҳ (0)