UzAuto Motors Captiva 5 автомобилларини сотишни тўхтатди

UzAuto Motors компанияси Chevrolet Captiva 5 автомобилларини етказиб бериш бўйича шартномалар тузишни тўхтатишга мажбур бўлганини маълум қилди.

«Юзага келган ҳолат компания тарихида биринчи бор юз бериши, лекин биз бугунги кунда жаҳон автомобиль саноати оғир кунларни бошдан кечираётгани ва бизнинг компаниямиз ҳам бундан мустасно эмаслигини бир неча бор хабар қилганмиз», — дейилади баёнотда. Компания раҳбарияти ва жамоаси «ўз мижозларидан келтирилган ноқулайликлар учун чексиз узр сўрайди».

Мижозлар мурожаатидан кейин 3 кун ичида тузилган шартномалар бўйича тўланган барча маблағлар тўлиқ қайтарилади. Шунингдек, компания қўшимча равишда олдиндан тўлов суммасининг 5 фоизини компенсация сифатида тақдим этади.

Бундан ташқари, янги кроссовер сотиб олиш эҳтиёжида бўлган харидорларимиз ўз хоҳишига кўра, Chevrolet Captiva-5 автомобили ўрнига Chevrolet Equinox ёки Tracker моделларини харид қилишлари мумкин. Алмаштирилган автомобилларни етказиб бериш муддати Chevrolet Captiva 5 учун тузилган шартномаларга мувофиқ, 2022 йил январь ойидан кечиктирилмаган ҳолда амалга оширилади.

Шунингдек, харидорларга юқорида кўрсатилган муддат асосида Captiva 5 автомобили ўрнига Malibu, Cobalt ёки Trailblazer автомобилларини харид қилиш имкониятини кўриб чиқиш таклиф этилади.

Ўзбекистонда янги Captiva 5 кроссоверининг сотувга чиқиши сентябрь ойида эълон қилинганди.

Маълумот учун, Captiva модели Ўзбекистон бозорига 2007 йилда кириб келган. Ўша йилнинг октябрида мамлакатда автомобилни йиғиш йўлга қўйилган. 2011 йилнинг сентябри ва 2017 йилнинг февралида модель янгиланган. 2018 йилнинг сентябрида эса GM’нинг глобал стратегиясига мувофий уни ишлаб чиқариш тўхтатилган.