AQSh davlat kotibi Entoni Blinken o‘tgan hafta Yamandagi Amerika elchixonasi binosiga hujum uyushtirgan xusiylardan diplomatik missiyaning mahalliy ishchilarini ozod etishni va elchixona hududidan chiqib ketishlarini talab qildi. Bu haqda Amerika tashqi siyosiy idorasi matbuot xizmatiga tayanib, “TASS” xabar berdi.
“Xusiylar zudlik bilan AQSh tomonidan yollangan qurolsiz yamanlik ishchilarni ozod qilishi, elchixona hududini tark etishi, egallab olingan mulklarni qaytarishi va tahdidlarni to‘xtatishi zarur”, — deyiladi xabarda.
Davlat departamenti rahbari Amerika diplomatik missiyasida ishlagan yamanliklarning qo‘lga olinishi va ularga yomon munosabatda bo‘linayotganini qoralagan. Blinken yuzaga kelgan vaziyat bo‘yicha “xalqaro hamkorlar, jumladan, BMT Xavfsizlik Kengashi a’zolari bilan yaqindan maslahatlashayotganini” ta’kidlagan.
Xusiylar 11-noyabr kuni AQShning Yamandagi elchixonasiga hujum qilib, binoni egallab olgan. Hujum oqibatida diplomatik vakolatxonaning 25 nafar xodimi qo‘lga olingan, ularning barchasi Yaman fuqarolari hisoblanadi. Amerikaning Sanodagi elchixonasining o‘zi 2015-yildan beri ishlamaydi.
Avvalroq Yamanning Marib shahriga amalga oshirilgan raketa zarbalari oqibatida 29 kishi halok bo‘lgani to‘g‘risida xabar berilgandi.
Izoh (0)