Turkmaniston prezident Gurbanguli Berdimuhamedov 18-noyabr kuni Janubiy Koreya poytaxti Seulda bo‘lib o‘tgan Shimoliy Iqtisodiy hamkorlik bo‘yicha Xalqaro forumda videoaloqa orqali ishtirok etdi. Bu haqda “Xronika Turkmenistana” xabar berdi.
“Turkmaniston Forumga Yevrosiyodagi iqtisodiy hamkorlikning strategik vektorlarini muhokama qilish va rivojlantirish uchun muhim xalqaro platforma, shuningdek, Koreya bilan ikki va ko‘p tomonlama formatdagi o‘zaro manfaatli iqtisodiy sheriklikning muvaffaqiyatli davomi sifatida qaraydi”, — dedi Berdimuhamedov.
Gurbanguli Berdimuhamedov pandemiya mavzusiga to‘xtalar ekan, “dunyo hamjamiyati, afsuski, unga o‘z vaqtida samarali qarshi tura olmadi”, deb kuyindi. U “jahondagi barcha davlatlarning intellektual, moddiy, moliyaviy va boshqa resurslarini birlashtirish orqaligina” pandemiyani yengish mumkinligini qo‘shimcha qildi.
Turkmaniston rahbari “koronavirus muammosini siyosatdan butunlay olib tashlash” va “pandemiyadan davlatlararo munosabatlarda ta’sir o‘tkazish vositasi sifatida foydalanishni to‘xtatish”ga chaqirdi.
Berdimuhamedov BMT Bosh Assambleyasining 76-sessiyasida – JSST rahbarligida koronavirus etiologiyasini o‘rganish, COVID-19 keltirib chiqaradigan kasalliklarni davolash va oldini olish sohasida maqsadli ishlarni olib borish bo‘yicha bildirgan o‘z tashabbuslarini eslatib o‘tdi.
Ma’lumot uchun, Turkmaniston o‘z hududida koronavirus infeksiyasi mavjudligini tan olmagandi. Dunyoda faqat ikkita davlat — Turkmaniston va Shimoliy Koreya hukumatining rasmiy ma’lumotlariga ko‘ra, bu mamlakatlar global pandemiyadan zarar ko‘rmagan.
Shuningdek, Turkmaniston Janubiy Koreya bilan sog‘liqni saqlash, “yashil” rivojlanish va oziq-ovqat xavfsizligi kabi sohalardagi samarali hamkorlikni yuksak qadrlashi ta’kidlandi.
“Gumanitar soha – birgalikdagi sa’y-harakatlarni talab qiladigan maydon. Bu yo‘nalishda katta salohiyatga ega Turkmaniston va Koreya yaqin kelajakda yangi qo‘shma loyihalarni amalga oshirishni boshlashi mumkin bo‘ladi, bu esa ‘Yangi Shimol siyosati’ni amalga oshirishga salmoqli hissa qo‘shadi”, — dedi davlat rahbari.
Gurbanguli Berdimuhamedov 2020-yilgi forumdagi nutqida janubiy koreyalik ishbilarmonlarga murojaat qilib, ularni “Turkmaniston bozoriga faolroq kirishga” chorlab, ularga qulay mehnat sharoitlarini yaratish va maksimal darajada yordam berishni va’da qilgan edi.
18-noyabr kuni Turkmaniston tashqi ishlar vaziri Rashid Meredov va uning koreyalik hamkasbi Chon Iy Yon o‘rtasida telefon suhbati bo‘lib o‘tdi. Tomonlar siyosiy, savdo-iqtisodiy va madaniy-gumanitar sohalardagi ikki tomonlama hamkorlikni muhokama qildi, deya xabar beradi Turkmaniston TIV.
Vazirlar, shuningdek, 30-noyabrga belgilangan 14-Markaziy Osiyo—Koreya hamkorlik forumi kun tartibini ham muhokama qilgan.
Eslatib o‘tamiz, JSST Turkmanistonning mamlakatda koronavirusga chalinish holatlari yo‘qligi haqidagi da’vosini shubha ostiga qo‘ygan. “Virus pandemiya sifatida qariyb ikki yildan beri butun dunyo bo‘ylab tarqalmoqda. Ilmiy jihatdan u Turkmanistonda tarqalmagani dargumon”, — deydi JSSTning favqulodda vaziyatlar bo‘yicha katta xodimi Ketrin Smollvud.
Doktor Smollvudning munosabati JSSTning Turkmaniston bayonotiga birinchi ommaviy e’tirozidir, chunki mamlakatda norasmiy manbalar COVID-19 holatlari soni ortib borayotgani haqida xabar bermoqda. Sentabr oxirida Turkmaniston fuqarolari JSSTga murojaat qilib, undan Turkmaniston hukumatini COVID-19 ni tan olishga majbur qilishni so‘ragan edi.
Izoh (0)