Buyuk Britaniya bosh vaziri Boris Jonson Pekinda o‘tkaziladigan Olimpiadaga diplomatik boykot e’lon qilish imkoniyatini ko‘rib chiqmoqda, deb xabar beradi “Kommersant”. Ushbu g‘oyani tashqi ishlar vaziri Elizabet Trass qo‘llab-quvvatlagan.
Buyuk Britaniya hukumatida Xitoydagi inson huquqlari bilan bog‘liq vaziyatga norozilik sifatida boykot e’lon qilish bo‘yicha “faol muhokama” davom etmoqda. Variantlardan biriga ko‘ra, vazirlar Olimpiada o‘yinlariga bormaydi. Shu bilan birga, rasmiylar mamlakat elchisining Xitoyda bo‘lishiga ruxsat berishi mumkin. The Times gazetasining yozishicha, Jonson tashqi ishlar vaziri Trassdan ko‘ra “ancha ehtiyotkor”. Oldinroq bosh vazir to‘liq sport boykotini istisno etgandi.
Jamoatlar palatasi deputatlari yozda hukumatni 2022-yili Pekinda o‘tkaziladigan Olimpiadada ishtirok etishdan voz kechishga chaqirgan edi. Diplomatik boykot masalasini AQSh ham ko‘rib chiqayotgan bo‘lishi mumkin. Prezident Bayden buni inkor etmagan. Pekin esa Vashingtonning rejalarini qoralagan.
Pekindagi XXIV qishki Olimpiada o‘yinlari 2022-yilning 4-fevralidan 20-fevraliga qadar bo‘lib o‘tadi.
Eslatib o‘tamiz, 200 ga yaqin inson huquqlarini himoya qilish tashkilotlari Xitoyda o‘tkazilishi kerak bo‘lgan 2022-yilgi Olimpiadani boykot qilishga da’vat qilgan edi. Buning sababi Shinjon-Uyg‘ur avtonom viloyatida inson huquqlari ommaviy ravishda buzilgani haqidagi xabarlar bo‘lib, ularda milliondan ortiq musulmon uyg‘urlar asirlik lagerlarida saqlanayotgani ta’kidlangan.
AQSh Davlat departamentining 30-mart kuni e’lon qilgan inson huquqlari bo‘yicha yillik hisobotida Xitoyning Shinjondagi siyosati “genotsid” deb ta’riflangan. “Xitoy hukumat idoralari asosan musulmon bo‘lgan uyg‘urlarga qarshi genotsid va insoniyatga qarshi jinoyatlar, shu jumladan, qamoq, qiynoqlar, majburiy sterilizatsiya, uyg‘urlar va boshqa diniy hamda etnik ozchiliklar vakillarini ta’qib qilish singari harakatlarni amalga oshirmoqda”, — deyiladi hisobotda.
Izoh (0)