AQSh prezidenti Jo Bayden o‘z vakolatlarini bir muddat vitse-prezident Kamala Xarrisga topshiradi. Bu haqda Oq uy matbuot kotibi Jen Psaki ma’lum qildi.
Psakining so‘zlariga ko‘ra, 19-noyabr kuni ertalab davlat rahbari Merilend shtatining Betesda shahridagi Uolter Rid tibbiyot markaziga rejali ko‘rikdan o‘tish uchun borgan. U kolonoskopiyadan o‘tadi.
“2002 va 2007-yillarda prezident Jorj Bush misolida bo‘lgani kabi va AQSh Konstitutsiyasida belgilangan tartibga muvofiq, prezident Bayden narkoz ostida bo‘lgan paytda qisqa muddatga hokimiyatni vitse-prezidentga o‘tkazadi”, — deyiladi Psakining bayonoti.
Uning so‘zlariga ko‘ra, 19-noyabr oqshomida Oq uy prezidentning tibbiy ko‘rikdan o‘tgani haqidagi yozma hisobotni e’lon qiladi.
Bayden kolonoskopiyadan 79 yoshga to‘lishidan bir kun oldin o‘tmoqda. ABC News xabariga ko‘ra, Bayden oxirgi marta saylov kampaniyasi vaqtida to‘liq tibbiy ko‘rikdan o‘tgan. 2019-yil dekabr oyida tibbiy hisobotda Bayden “prezidentlik vazifalarini muvaffaqiyatli bajarishga yaroqli, sog‘lom, baquvvat 77 yoshli erkak” deb e’lon qilingan.
Prezident lavozimiga kirishishidan biroz oldin, shifokorlar Baydenga bir nechta tashxis qo‘ygan: unda yurak urishi ritmida notekislik, qonda yog‘lar yoki lipidlar konsentratsiyasining oshishi va qizilo‘ngachda ayrim muammolar qayd etilgan.
O‘tmishda Baydenning so‘g‘lig‘ida kuzatilgan eng jiddiy muammolar 1988-yilda uning boshidagi qon tomirlari kengayishi bo‘lgan. 2020-yilning noyabr oyida Bayden it bilan o‘ynayotgan vaqtda yiqilib oyog‘i shikastlangan edi. Kompyuter tomografiyasida uning suyaklaridagi yoriqlar aniqlangan.
Izoh (0)