O‘zbekistonda 1—18-noyabr kunlari tez yordam xizmatiga bolalar bo‘yicha 20 mingdan ziyod chaqiriq kelib tushdi. Bu haqda Sog‘liqni saqlash vazirligi xabar qildi.
Ma’lum bo‘lishicha, so‘nggi paytlarda O‘zbekistonda, ayniqsa, Toshkent shahrida bolalar o‘rtasida mavsumga xos bo‘lgan o‘tkir respirator virusli infeksiyalarga chalinish holatlari ko‘p kuzatilmoqda. Respublika shoshilinch tibbiy yordam ilmiy markazi Toshkent shahar tez tibbiy yordam stansiyasi bosh shifokori Doniyor Bo‘ribayevning aytishicha, yuqumli mavsumiy kasalliklarning ortishi tez yordam xizmatiga bo‘ladigan chaqiriqlar soni ortishiga sabab bo‘lgan.
“1—18 noyabr kunlari Toshkent shahar tez yordam xizmati call-markaziga kelib tushgan jami chaqiriqlar soni 61 ming 152 tani tashkil etib, bolalar bo‘yicha umumiy murojaatlar 20 ming 073 taga yetdi. Shundan tana harorati ko‘tarilgan, O‘RVI va pnevmoniya holatlari kuzatilgan 10 ming 642 nafar bolaga sifatli tibbiy yordam ko‘rsatilib, zotiljamga chalingan 321 nafar bola gospitalizatsiya qilindi”, — degan u.
Qayd etilishicha, noyabr oyida “103” xizmatiga bo‘layotgan kunlik murojaatlar soni o‘rtacha 1200—1400 tani tashkil qilmoqda. Eng ko‘p chaqiriq esa 1-noyabr sanasiga to‘g‘ri kelgan — 1631 ta murojaat.
Eslatib o‘tamiz, Toshkent shahrida yosh bolalar orasida o‘tkir respirator kasalliklarning davriy ko‘tarilishi kuzatilayotgani va poytaxtdagi bolalar klinik shifoxonalariga yuklamalar sezilarli darajada ortgani sababli Sog‘liqni saqlash vaziri Bahodir Musayev boshchiligida ishchi guruh tuzilib, 13-noyabr tunda poytaxt shifoxonalaridagi vaziyat o‘rganilgan edi.
Avvalroq Toshkentda yosh bolalar orasida gripp bilan kasallanish holati keskin ko‘paygani, bolalarning grippga chalinish holati bilan har kuni 400 ga yaqin murojaat kelayotgani xabar qilingandi.
Izoh (0)