Investitsiyalar va tashqi savdo vazirligida Sirdaryo viloyatida 1600 megavatt quvvatga ega bo‘lgan issiqlik elektr stansiyasini qurish bo‘yicha xalqaro tender natijalari e’lon qilindi.
Qayd etilishicha, dastlabki malaka tanlovida Xitoy, Janubiy Koreya, Yaponiya, Saudiya Arabistoni, BAA va Fransiyadan 10 ta kompaniya ishtirok etib, ulardan 8 tasi ushbu tanlovdan muvaffaqiyatli o‘tdi.
Talabgorlarning taqdim etilgan malakaviy ma’lumotlarni baholash natijalariga muvofiq, Sirdaryo viloyatidagi loyiha bo‘yicha 2 ta kompaniya va 1 ta konsorsiumdan yuborilgan elektr energiyasi tariflari to‘g‘risidagi moliyaviy takliflar ochilishiga ruxsat berildi. Bular ACWA Power hamda Powerchina Resources Ltd kompaniyalari, shuningdek, EDF, Nebras Power, Sojitz Corporation kompaniyalar konsorsiumidir.
EDF, Nebras Power, Sojitz Corporation (Fransiya, Qatar, Yaponiya) kompaniyalar konsorsiumi ishlab chiqariladigan 1 kilovatt/soat elektr energiya uchun 3,367 AQSh sentga teng bo‘lgan tarifi bilan issiqlik elektr stansiyasini qurish bo‘yicha xalqaro tender g‘olibi deb e’lon qilindi.
Powerchina Resources Ltd ishlab chiqariladigan 1 kilovatt/soat elektr energiya uchun 3,471 AQSH sentga teng bo‘lgan tarifi bilan ushbu tenderning zaxira g‘olibi deb e’lon qilindi.
Issiqlik elektr stansiyasi 2025-yilning o‘rtasida ishga tushirilishi kutilmoqda. Elektr stansiyasining ishga tushirilishi yiliga 12 milliard kilovatt/soat elektr energiyasini ishlab chiqarishni ta’minlaydi.
Ushbu loyihaning amalga oshirilishi O‘zbekistonga elektr energiyasi hajmini oshirish maqsadlariga erishishga, 1,5 million xonadonni qo‘shimcha elektr energiyasi bilan ta’minlash, shuningdek, qurilish vaqtida 1000 ga yaqin yangi hamda stansiyadan foydalanish vaqtida 50 ta doimiy ish o‘rni yaratishga imkon beradi.
Xalqaro Moliya korporatsiyasi ishtirokidagi muzokaralar chog‘ida Sirdaryo viloyatining Shirin shahrida qurilish maydonchalari tanlab olindi. Loyihani amalga oshirishga jalb qilinayotgan investitsiyalar miqdori 1,2 milliard AQSh dollariga baholanmoqda.
Bundan avval O‘zbekistonda 2022-yildan elektr tarmog‘iga ulanish to‘liq elektron platformaga o‘tkazilishi, O‘zbekistonda quvvati 100 MVt bo‘lgan shamol elektr stansiyasi qurilishi hamda O‘zbekistonda birinchi marta davlat fuqarodan elektr energiya sotib olgani haqida xabar berilgandi.
Izoh (0)