Ўзбекистонда 1—18 ноябрь кунлари тез ёрдам хизматига болалар бўйича 20 мингдан зиёд чақириқ келиб тушди. Бу ҳақда Соғлиқни сақлаш вазирлиги хабар қилди.
Маълум бўлишича, сўнгги пайтларда Ўзбекистонда, айниқса, Тошкент шаҳрида болалар ўртасида мавсумга хос бўлган ўткир респиратор вирусли инфекцияларга чалиниш ҳолатлари кўп кузатилмоқда. Республика шошилинч тиббий ёрдам илмий маркази Тошкент шаҳар тез тиббий ёрдам станцияси бош шифокори Дониёр Бўрибаевнинг айтишича, юқумли мавсумий касалликларнинг ортиши тез ёрдам хизматига бўладиган чақириқлар сони ортишига сабаб бўлган.
«1—18 ноябрь кунлари Тошкент шаҳар тез ёрдам хизмати call-марказига келиб тушган жами чақириқлар сони 61 минг 152 тани ташкил этиб, болалар бўйича умумий мурожаатлар 20 минг 073 тага етди. Шундан тана ҳарорати кўтарилган, ЎРВИ ва пневмония ҳолатлари кузатилган 10 минг 642 нафар болага сифатли тиббий ёрдам кўрсатилиб, зотилжамга чалинган 321 нафар бола госпитализация қилинди», — деган у.
Қайд этилишича, ноябрь ойида «103» хизматига бўлаётган кунлик мурожаатлар сони ўртача 1200—1400 тани ташкил қилмоқда. Энг кўп чақириқ эса 1 ноябрь санасига тўғри келган — 1631 та мурожаат.
Эслатиб ўтамиз, Тошкент шаҳрида ёш болалар орасида ўткир респиратор касалликларнинг даврий кўтарилиши кузатилаётгани ва пойтахтдаги болалар клиник шифохоналарига юкламалар сезиларли даражада ортгани сабабли Соғлиқни сақлаш вазири Баҳодир Мусаев бошчилигида ишчи гуруҳ тузилиб, 13 ноябрь тунда пойтахт шифохоналаридаги вазият ўрганилган эди.
Аввалроқ Тошкентда ёш болалар орасида грипп билан касалланиш ҳолати кескин кўпайгани, болаларнинг гриппга чалиниш ҳолати билан ҳар куни 400 га яқин мурожаат келаётгани хабар қилинганди.
Изоҳ (0)