Afg‘onistondagi yomon iqtisodiy vaziyat terrorizmning tarqalishi, shuningdek, qurol-yarog‘ va giyohvand moddalar savdosining ortishi bilan tobora ko‘proq tahdid tug‘dirmoqda. Bu kabi xulosaga BMT Xavfsizlik kengashi yig‘ilishi ishtirokchilari kelgan, deb xabar beradi “Kommersant”.
Rossiyaning tashkilotdagi doimiy vakili Vasiliy Nebenzyaning fikricha, inqirozni yengish uchun imkon boricha tezroq g‘arb banklarida muzlatilgan afg‘on hisoblarini blokdan chiqarish kerak.
“Bugungi kunda qo‘shni davlatlar hududiga migratsiya oqimi ko‘rinishida niqoblangan terrorchilik va giyohvandlik moddalar savdosi faolligining ortib ketishi borasida real tahdid mavjud. Toliblar ushbu qiyinchiliklarni bartaraf etish bo‘yicha o‘z va’dalarini bajarishda davom etadi deb umid qilamiz. Xalqaro moliya institutlari liniyasi bo‘yicha muzlatilgan mablag‘larni faollashtirishsiz Afg‘onistondagi ijtimoiy-iqtisodiy muammolarni bartaraf etib bo‘maydi”, — deydi Nebenzya.
Uchrashuvda Rossiya tomoni BMT shafeligida Afg‘oniston bo‘yicha xalqaro donor konferensiyasini imkon qadar tezroq chaqirish lozimligini bildirgan. “Mojarodan keyingi Afg‘onistonni iqtisodiy-moliyaviy jihatdan rivojantirish va qayta tiklashdagi og‘ir yukni so‘nggi 20 yil davomida ushbu mamlakatda bo‘lgan kuchlar, harbiy kontingentlar zimmasiga olishi kerakligini anglash lozim”, — deydi Rossiyaning BMTdagi maxsus vakili.
Oktabr oyida Moskvada “Tolibon” bilan muzokaralar o‘tkazilgan. Ular hokimiyatga kelgach, Afg‘onistonda muvaqqat hukumat tuzdi va uning xalqaro darajada tan olinishiga erishish niyatida. Rossiya tomoning baholashicha, Afg‘oniston gumanitar inqiroz yoqasida turibdi: mamlakatda qurg‘oqchilik davom etayotgani va oziq-ovqat mahsulotlari narxi ko‘tarilayotgani sabab 18 milliondan ortiq odam och qolmoqda.
Avgust oyida Afg‘onistonda “Tolibon” hokimiyat tepasiga kelganidan so‘ng, AQSh Afg‘onistonning Amerika banklaridagi davlat zaxiralarini muzlatib qo‘ygan. Xalqaro valyuta jamg‘armasi (XVJ) ma’lumotlariga ko‘ra, 2021-yil aprel oyi holatida Afg‘oniston hukumati zaxiralari 9,4 milliard dollar bo‘lgan, bu mamlakat yillik yalpi ichki mahsulotining uchdan bir qismini tashkil qiladi. Bu mablag‘lar asosan AQShda saqlanadi, Amerika banklaridagi mablag‘larning aniq miqdori noma’lum, ammo Washington Post ma’lumotlariga ko‘ra, bu milliardlab dollarni tashkil qiladi.
Keyinroq XVJ ham Afg‘onistonga yordam berishni to‘xtatdi. Bunga “Tolibon” hokimiyatining tan olinish-olinmasligi muammosi sabab bo‘ldi. “XVJ har doimgidek xalqaro hamjamiyatning fikriga asoslanadi. Hozirda xalqaro hamjamiyatda Afg‘onistondagi hukumatni tan olish borasida aniqlik yo‘q, buning natijasida mamlakat maxsus qarz olish huquqlaridan yoki XVJning boshqa resurslaridan foydalana olmaydi”, — deyiladi jamg‘arma xabarida.
Izoh (0)