Sankt-Peterburg davlat tog‘-kon universiteti rektori Vladimir Litvinenko “Solnechnoe” posyolkasidagi besh yulduzli mehmonxonaning yagona egasiga aylandi. Bu haqda “Kontur.Fokus” bazasi — Rossiya va xorij kontragentlarini tekshirishga mo‘ljallangan servis ma’lumotlariga tayanib, Meduza xabar berdi.
Ma’lumotlar bazasiga ko‘ra, Litvinenkoga “Garmoniya” MChJ tegishli. “‘Garmoniya’ xalqaro akademik markazi” MChJ mehmonxonasi “Rosturizm”ning Turistik obyektlar federal ro‘yxatiga kiritilgan.
Shahar tipidagi ushbu mehmonxona besh yulduzli maqomga 2018-yilda ega bo‘lgan. “Rosturizm” bazasida obyektga berilgan izohga ko‘ra, mehmonxonada 72 ta xona mavjud bo‘lib, ularning biri syut (lyuks), 52 tasi birinchi toifali xonalar.
Telegram’dagi “ChTD” kanalining yozishicha, mehmonxonaning sayti yo‘q, “Rosturizm” saytida ko‘rsatilgan telefon raqamiga esa hech kim javob bermaydi. Shu bilan birga tashkilotda 19 kishi ishlaydi, mehmonxona balansida 1 milliard rubldan (13,8 million dollar) ortiq mablag‘ mavjud.
Vladimir Litvinenko 1990-yillar oxirida Rossiyaning bo‘lajak prezidenti Vladimir Putin nomzodlik dissertatsiyasini yoqlagan ilmiy kengashni boshqargan. 2000, 2004 va 2012-yillarda Litvinenko Putinning Sankt-Peterburgdagi saylovoldi shtabi bo‘linmasini boshqargan.
2021-yilda Forbes’ning Rossiyadagi versiyasi Litvinenkonining boyligini 1,5 milliard dollarga baholab, uni dollarli milliarderlarning har yilgi reytingiga kiritgan. Putinning ilmiy rahbari eng badavlat rossiyaliklar ro‘yxatiga 20,98 foiz paketiga egalik qiladigan “FosAgro” aksiyalarining o‘sishi hisobiga kirishga muvaffaq bo‘lgan.
Izoh (0)