Afrika g‘arbidagi Burkina-Faso davlatida jangarilarning politsiya postiga hujumi oqibatida 53 kishi halok bo‘ldi. Bu haqda hukumatning rasmiy vakili Usseni Tamburaga tayanib, “Korrespondent.net” xabar berdi.
Avvalroq hujum oqibatida 19 kishi halok bo‘lgani aytilgan edi. Ta’kidlanishicha, qurbonlar orasida to‘rt nafar tinch aholi vakili ham bor.
Rasmiylarning ma’lumotlariga ko‘ra, qurbonlar bundan ham ko‘p bo‘lishi mumkin edi — 46 nafar harbiy politsiyachi omon qolishga muvaffaq bo‘lgan.
Sodir bo‘lgan holat bo‘yicha birinchi okrug komandiri va Shimoliy sektor guruhi komandiri lavozimlaridan olingan. Halok bo‘lganlar xotirasiga 16-noyabr kuni mamlakatda uch kunlik umummilliy motam e’lon qilingan.
Ta’kidlash kerakki, hujum sodir bo‘lgan Burkina-Fasoning shimolida ikkita terrorchilik guruhi mavjud — IShID va Ansar ul-Islom. 2018-yilda minglab tinch aholi terrorchilar qurboniga aylangan, yana 1,5 million fuqaro o‘z uylarini tark etishga majbur bo‘lgan.
Avvalroq Nigerda qurolli jangarilar 70 ga yaqin kishini o‘ldirgani, Efiopiyada olti oylik muddatga favqulodda holat e’lon qilingani, Nigeriyada qurolli shaxslarning masjidga qilgan hujumi oqibatida 18 kishi halok bo‘lgani to‘g‘risida xabar berilgandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)