Germaniya kansleri vazifasini bajaruvchi Angela Merkel lavozimini tark etganidan so‘ng uning ofisi to‘qqiz kishigacha kengaymoqda, ular budjetdan maosh oladi. Bu haqda Der Spiegel jurnali Germaniya Moliya vazirligi maktubiga tayanib xabar berdi.
Merkel ofis rahbari va uning o‘rinbosarini 10 412 yevro maosh bilan ta’minlaydi. Bundan tashqari, byuroda ikki kotib, ikki referant, bir nafar ofis xodimi va ikki haydovchi ish boshlaydi. Ularni saqlab turish Germaniya Mudofaa vazirligidagi lavozimlarini bekor qilish hisobiga amalga oshiriladi.
Nashrning qayd etishicha, Germaniya sobiq kansleri va prezidentlari idoralarining ishini ta’minlash ko‘p marotaba tanqid qilingan. 2019-yilda Bundestagning Budjet qo‘mitasi bunday idoralardagi xodimlar sonini besh nafargacha cheklash, shuningdek, ularning ish haqi darajasini kamaytirish uchun ovoz bergan.
Merkelning ofisini tashkil etish rejalari ham tanqidlarga sabab bo‘ldi. “Merkel xonim har doim kamtarin kansler sifatida tasvirlangan. Yakunda ham shunday bo‘lishi aniq. Bo‘lajak ofisingizning hashamatli muhiti sizni go‘yoki kanslerning soya idorasini ochmoqchiligingiz haqida tassurot uyg‘otadi. Moliya vazirligining kotibi Olaf Shols shubhasiz, oldingizda qarzdor. Bu haddan oshib ketishlarning boshqa izohi yo‘q”, — dedi so‘l partiya rahbari o‘rinbosari Gezine Lyotch.
Merkel 2005-yildan beri (to‘rt muddat) Germaniya kansleri bo‘lgan, shuningdek, Xristian-Demokratik Ittifoqiga (XDI) raislik qilgan. U 2018-yilda keyingi muddati tugagach kanslerlik lavozimidan ketishini e’lon qilgandi.
27-sentabr kuni bo‘lib o‘tgan Germaniyadagi parlament saylovlarida amaldagi moliya vaziri Olaf Shols rahbarligidagi Sotsial-demokratik partiya (GSDP) g‘alaba qozondi. Unga saylovchilarning 25,7 foizi ovoz berdi, ushbu natijaga muvofiq u yangi Bundestagda 206 ta o‘ringa ega bo‘ladi.
26-oktabr kuni Germaniya prezidenti Frank-Valter Shtaynmayer Merkelga hukumat rahbari sifatidagi muddati rasman tugagani to‘g‘risidagi maktubni topshirdi. U yangi Vazirlar Mahkamasi shakllangunga qadar kansler lavozimida ishlab turadi.
Mavzuga doir:
Izoh (0)