AQSh prezidenti Jo Bayden AQSh Xitoy bilan ziddiyatiga qaramay Pekin Olimpiadasiga delegatsiya yuborishi yoki yo‘qligi haqida jurnalistlarning savoliga javob berdi. Bayden nutqining stenogrammasi Oq uy saytiga joylashtirilgan.
Bungacha Xitoy bilan munosabatlardagi asosiy muammolar va xususan, Tayvan atrofidagi vaziyat haqida gapirar ekan, Bayden Qo‘shma Shtatlar Pekinga nisbatan siyosatini hech qanday tarzda o‘zgartirish va “qoidalar”ni buzish niyatida emasligini aytdi.
16-noyabr kuni Washington Post gazetasi bir nechta manbalarga tayanib, Bayden ma’muriyati yaqin orada 2022-yilgi Pekin Olimpiadasiga diplomatik boykot e’lon qilmoqchiligi haqida xabar bergandi. Bu na prezident, na AQSh hukumatining boshqa birorta amaldori Pekindagi Olimpiada o‘yinlarida ishtirok etmasligini anglatadi. Ma’muriyat manbalariga ko‘ra, Bayden mazkur qarorni oy oxirigacha tasdiqlashi kutilmoqda.
Pekin va Vashington o‘rtasidagi munosabatlarning so‘nggi keskinlashuvi Xitoy qo‘shinlarining Tayvan bo‘g‘ozidagi faolligi ortgani bilan bog‘liq. Oktabr oyi boshida Tayvan Mudofaa vazirligi Xitoy samolyotlari tomonidan chegarani kesib o‘tish holatlari rekord darajada qayd etilgani haqida xabar bergan. Shundan so‘ng, Bayden Xitoy tomonidan tajovuz sodir bo‘lgan taqdirda Qo‘shma Shtatlar Tayvanni qo‘llab-quvvatlashga tayyormi yoki yo‘qmi, degan savolga ijobiy javob bergan, biroq u “yagona Xitoy” tamoyilini qo‘llab-quvvatlashini ham aytgan.
O‘z navbatida Xitoy raisi Si Szinpinning ta’kidlashicha, mamlakatlar Hind—Tinch okeani mintaqasidagi mavjud keskinliklar Sovuq urush mentalitetining qaytalanishiga olib kelmasligi uchun barcha sa’y-harakatlarini ishga solishi kerak. Unga ko‘ra, mintaqada chegaralarni mafkuraviy yoki geosiyosiy yo‘nalishlar bo‘yicha chizishga urinishlar natija keltirmaydi.
Avvalroq Jo Bayden va Si Szinpin o‘rtasida videokonferensaloqa uchrashuvi bo‘lib o‘tgandi. Unda AQSh—Xitoy o‘rtasidagi raqobat, pandemiya va Tayvan masalalarini muhokama qilingan. Onlayn uchrashuv 3,5 soat davom etgan.
Izoh (0)