Hindiston Oliy sudi poytaxt Nyu-Dehli rahbariyatiga havoning ifloslanishi xavfli darajaga yetgani sababli qattiq karantin joriy etishni buyurdi. Bu haqda “Korrespondent.net” xabar berdi.
Qayd etilishicha, shaharda havo sifati indeksi 343 ni tashkil etadi, odamlar uchun esa 50 ko‘rsatkich xavfli hisoblanadi. Bunga o‘rim-yig‘imdan keyin dalalarda somonlarning keng ko‘lamda yonayotgani sabab bo‘lmoqda.
Ta’kidlanishicha, Nyu-Dehli va shahar atrofidagi aholining nafas olish muammolari bilan shifokorlarga murojaat qilishi ortgan. Ayniqsa, bolalar uchun tutunning zarari yuqori.
Kasallanish va qurbonlar ko‘paymasligi uchun lokdaun doirasida poytaxtdagi ishchilar va talabalar masofaviy rejimga o‘tishi kerak. Bolalarga binolarni tark etish taqiqlanadi.
Bundan tashqari, Hindiston hukumati poytaxt havosining ifloslanishini kamaytirish uchun boshqa choralarni ham ko‘rdi. Xususan, Nyu-Dehli yaqinidagi 11 ta ko‘mir elektr stansiyasidan oltitasining ishini oy oxirigacha to‘xtatib turishga qaror qilindi.
Elektr energiyasi taqchilligi yuzaga kelgan taqdirda, u shahardan 300 kilometr radius tashqarida joylashgan elektr stansiyalari tomonidan ta’minlanadi.
Eslatib o‘tamiz, 4-noyabr kuni Toshkentda chang miqdori ruxsat etilgan me’yordan 5 barobarga, keyinroq 30 barobargacha ko‘tarilgandi va poytaxt havoning ifloslanish darajasi bo‘yicha dunyoda birinchi o‘ringa chiqdi. 8-noyabr kuni Toshkent havosidagi chang miqdori normal ko‘rsatkichga qaytdi.
Mavzuga doir:
- Dunyo aholisining qariyb yarmi iflos havodan nafas oladi
- JSST 15 yil ichida birinchi marta havo sifati bo‘yicha tavsiyalarini kuchaytirdi. Havo ifloslanishidan yiliga 7 mln kishi vafot etadi. Bu chekish oqibatidagi o‘lim darajasiga yaqindir
- Avstraliya poytaxtida havoning ifloslanish darajasi o‘rmon yong‘inlari tufayli me’yordan 26 baravarga oshib ketdi
Izoh (0)