Афғонистондаги ёмон иқтисодий вазият терроризмнинг тарқалиши, шунингдек, қурол-яроғ ва гиёҳванд моддалар савдосининг ортиши билан тобора кўпроқ таҳдид туғдирмоқда. Бу каби хулосага БМТ Хавфсизлик кенгаши йиғилиши иштирокчилари келган, деб хабар беради «Коммерсантъ».
Россиянинг ташкилотдаги доимий вакили Василий Небензянинг фикрича, инқирозни енгиш учун имкон борича тезроқ ғарб банкларида музлатилган афғон ҳисобларини блокдан чиқариш керак.
«Бугунги кунда қўшни давлатлар ҳудудига миграция оқими кўринишида ниқобланган террорчилик ва гиёҳвандлик моддалар савдоси фаоллигининг ортиб кетиши борасида реал таҳдид мавжуд. Толиблар ушбу қийинчиликларни бартараф этиш бўйича ўз ваъдаларини бажаришда давом этади деб умид қиламиз. Халқаро молия институтлари линияси бўйича музлатилган маблағларни фаоллаштиришсиз Афғонистондаги ижтимоий-иқтисодий муаммоларни бартараф этиб бўмайди», — дейди Небензя.
Учрашувда Россия томони БМТ шафелигида Афғонистон бўйича халқаро донор конференциясини имкон қадар тезроқ чақириш лозимлигини билдирган. «Можародан кейинги Афғонистонни иқтисодий-молиявий жиҳатдан ривожантириш ва қайта тиклашдаги оғир юкни сўнгги 20 йил давомида ушбу мамлакатда бўлган кучлар, ҳарбий контингентлар зиммасига олиши кераклигини англаш лозим», — дейди Россиянинг БМТдаги махсус вакили.
Октябрь ойида Москвада «Толибон» билан музокаралар ўтказилган. Улар ҳокимиятга келгач, Афғонистонда муваққат ҳукумат тузди ва унинг халқаро даражада тан олинишига эришиш ниятида. Россия томонинг баҳолашича, Афғонистон гуманитар инқироз ёқасида турибди: мамлакатда қурғоқчилик давом этаётгани ва озиқ-овқат маҳсулотлари нархи кўтарилаётгани сабаб 18 миллиондан ортиқ одам оч қолмоқда.
Август ойида Афғонистонда «Толибон» ҳокимият тепасига келганидан сўнг, АҚШ Афғонистоннинг Америка банкларидаги давлат захираларини музлатиб қўйган. Халқаро валюта жамғармаси (ХВЖ) маълумотларига кўра, 2021 йил апрель ойи ҳолатида Афғонистон ҳукумати захиралари 9,4 миллиард доллар бўлган, бу мамлакат йиллик ялпи ички маҳсулотининг учдан бир қисмини ташкил қилади. Бу маблағлар асосан АҚШда сақланади, Америка банкларидаги маблағларнинг аниқ миқдори номаълум, аммо Washington Post маълумотларига кўра, бу миллиардлаб долларни ташкил қилади.
Кейинроқ ХВЖ ҳам Афғонистонга ёрдам беришни тўхтатди. Бунга «Толибон» ҳокимиятининг тан олиниш-олинмаслиги муаммоси сабаб бўлди. «ХВЖ ҳар доимгидек халқаро ҳамжамиятнинг фикрига асосланади. Ҳозирда халқаро ҳамжамиятда Афғонистондаги ҳукуматни тан олиш борасида аниқлик йўқ, бунинг натижасида мамлакат махсус қарз олиш ҳуқуқларидан ёки ХВЖнинг бошқа ресурсларидан фойдалана олмайди», — дейилади жамғарма хабарида.
Изоҳ (0)