Shimoliy Koreya yetakchisi Kim Chen In bir oy ichida birinchi marta davlat matbuotida ko‘rinish berdi, u yirik qurilish loyihasi olib borilayotgan Samchjiyen shahriga tashrif buyurgan. Bu haqda Shimoliy Koreya markaziy telegraf agentligiga tayanib, “Interfaks” xabar berdi.
Samchjiyen shahrida Kim Chen In shahar qurilishi, kommunal xo‘jalik va qishloq xo‘jaligi holati bilan “obdon tanishgan”. Shimoliy Koreya hukumati 2019-yilda Samchjiyenning maqomini tumandan shahar darajasiga ko‘targan va bu yerni mamlakatning “eng boy” hududiga aylantirishga chaqirgandi. Pektusan tog‘i etagida joylashgan Samchjiyen Kim Chen Inning marhum otasi, mamlakatning sobiq rahbari Kim Chen Ir tug‘ilgan joydir.
Dastlab Samchjiyendagi qurilishni 2020-yilga — hukmron partiya tashkil topganining 75 yilligiga qadar yakunlash rejalashtirilgan edi, biroq KXDRga qarshi qattiq sanksiyalarning joriy etilishi va COVID-19 tufayli chegaralarning uzoq muddat yopilishi tufayli rejani belgilangan muddatda bajarishning imkoni bo‘lmadi.
Kim Chen Inning Samchjiyenga tashrifi uning so‘nggi bir oy ichida birinchi marta ommaviy axborot vositalarida chiqishi bo‘ldi. Bungacha Shimoliy Koreya yetakchisining faoliyati haqida 11-oktabr kuni davlat matbuotida xabar berilgan edi. Kim Chen Inning uzoq vaqt jamoatchilik oldida yo‘qligi xorijiy mamlakatlarda uning sog‘lig‘i haqida turli taxminlarga sabab bo‘ladi.
Misol uchun 2014-yilda KXDR yetakchisi taxminan olti hafta davomida omma oldiga chiqmagan, keyinroq esa uni hassa bilan ko‘rishgan. Keyinroq Janubiy Koreya razvedka agentligi Kim Chen Inning to‘pig‘idagi kistani olib tashlash uchun operatsiya qilingani haqida xabar bergan.
Shimoliy Koreya yetakchisining 2020-yil bahorida jamoatchilikka uch hafta ko‘rinmagani, uning yurak operatsiyasidan so‘ng og‘ir kasal bo‘lib qolgani haqidagi mish-mishlarga sabab bo‘lgan edi. Ayrim OAVlar Kim Chen In vafot etgan bo‘lishi mumkinligini taxmin qilgan. Boshqalari esa u COVID-19 pandemiyasi tufayli ehtiyot chorasi sifatida oilasi bilan izolyatsiya qilinganini ta’kidlagan.
2021-yilning yozida OAV Kim Chen Inning sezilarli darajada vazn yo‘qotganini payqadi va bu yana uning sog‘lig‘i bilan bog‘liq muammolar mavjudligi haqida gap-so‘zlarni keltirib chiqardi. Ayrimlar hatto, Shimoliy Koreya yetakchisi rolini uning qiyofadoshi ijro etib turibdi, deya taxmin qildi.
Izoh (0)