Шимолий Корея етакчиси Ким Чен Ин бир ой ичида биринчи марта давлат матбуотида кўриниш берди, у йирик қурилиш лойиҳаси олиб борилаётган Самчжиен шаҳрига ташриф буюрган. Бу ҳақда Шимолий Корея марказий телеграф агентлигига таяниб, «Интерфакс» хабар берди.
Самчжиен шаҳрида Ким Чен Ин шаҳар қурилиши, коммунал хўжалик ва қишлоқ хўжалиги ҳолати билан «обдон танишган». Шимолий Корея ҳукумати 2019 йилда Самчжиеннинг мақомини тумандан шаҳар даражасига кўтарган ва бу ерни мамлакатнинг «энг бой» ҳудудига айлантиришга чақирганди. Пектусан тоғи этагида жойлашган Самчжиен Ким Чен Иннинг марҳум отаси, мамлакатнинг собиқ раҳбари Ким Чен Ир туғилган жойдир.
Дастлаб Самчжиендаги қурилишни 2020 йилга — ҳукмрон партия ташкил топганининг 75 йиллигига қадар якунлаш режалаштирилган эди, бироқ КХДРга қарши қаттиқ санкцияларнинг жорий этилиши ва COVID-19 туфайли чегараларнинг узоқ муддат ёпилиши туфайли режани белгиланган муддатда бажаришнинг имкони бўлмади.
Ким Чен Иннинг Самчжиенга ташрифи унинг сўнгги бир ой ичида биринчи марта оммавий ахборот воситаларида чиқиши бўлди. Бунгача Шимолий Корея етакчисининг фаолияти ҳақида 11 октябрь куни давлат матбуотида хабар берилган эди. Ким Чен Иннинг узоқ вақт жамоатчилик олдида йўқлиги хорижий мамлакатларда унинг соғлиғи ҳақида турли тахминларга сабаб бўлади.
Мисол учун 2014 йилда КХДР етакчиси тахминан олти ҳафта давомида омма олдига чиқмаган, кейинроқ эса уни ҳасса билан кўришган. Кейинроқ Жанубий Корея разведка агентлиги Ким Чен Иннинг тўпиғидаги кистани олиб ташлаш учун операция қилингани ҳақида хабар берган.
Шимолий Корея етакчисининг 2020 йил баҳорида жамоатчиликка уч ҳафта кўринмагани, унинг юрак операциясидан сўнг оғир касал бўлиб қолгани ҳақидаги миш-мишларга сабаб бўлган эди. Айрим ОАВлар Ким Чен Ин вафот этган бўлиши мумкинлигини тахмин қилган. Бошқалари эса у COVID-19 пандемияси туфайли эҳтиёт чораси сифатида оиласи билан изоляция қилинганини таъкидлаган.
2021 йилнинг ёзида ОАВ Ким Чен Иннинг сезиларли даражада вазн йўқотганини пайқади ва бу яна унинг соғлиғи билан боғлиқ муаммолар мавжудлиги ҳақида гап-сўзларни келтириб чиқарди. Айримлар ҳатто, Шимолий Корея етакчиси ролини унинг қиёфадоши ижро этиб турибди, дея тахмин қилди.
Изоҳ (0)