Surxondaryoda piyoda umriga zomin bo‘lgan haydovchiga sud hukmi o‘qildi, Sirdaryodagi YTHda 3 kishi jabrlandi. YTH tafsilotlari

O‘zbekiston yo‘llarida so‘nggi kunlarda sodir bo‘lgan yo‘l-transport hodisalari va ularning oqibatlari haqida batafsil ma’lumot beramiz.

Surxondaryoda 17 yoshli yigitning umriga zomin bo‘lgan haydovchi 5 yilga ozodlikdan mahrum etildi.

Denov tumani “Sebzor” mahallasidan o‘tuvchi 4R-107 avtomobil yo‘lining 2-kilometrida 2021-yil 10-iyun kuni Damas quvib o‘tish qoidasini buzgan holda tezlikni oshirib, boshqaruvni yo‘qotgan va yo‘lning chap tomonida, o‘z yashash uyida oldida turgan 2004-yilda tug‘ilgan B.K.ni urib yuborgan. Oqibatda 17 yoshli fuqaro vafot etgan.

Qayd etilishicha, Damas haydovchisini guvohnoma olganiga bir yil bo‘lgan, shu vaqt ichida 15 marta qoidani buzgan. Hatto bir marta IIO xodimining qonuniy talabini ham bajarmagan, yana yo‘lda qarama-qarshi harakatlangani uchun javobgarlikka tortilgan.

Sudda haydovchi A.A.ga nisbatan Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish xavfsizligi qoidalarini buzish) bilan aybdor deb topilib, 3 yil muddatga barcha turdagi transport vositalarini boshqarish huquqidan mahrum etilib, 5 yilga ozodlikdan mahrum qilingan.

Sirdaryoda Nexia sodir etgan YTH oqibatida 3 kishi shifoxonaga yotqizildi.

2021-yilning 9-noyabr kuni soat taxminan 18:00 da Sirdaryo viloyati IIB YHXB kelib tushgan xabarga ko‘ra, Guliston tumanidan o‘tgan 4K–651 avtomobil yo‘lining 18-kilometrida Nexia rul boshqaruvini yo‘qotib yo‘l-transport hodisasi sodir etgan.

Oqibatda haydovchi va 2 nafar yo‘lovchi tuman tibbiyot birlashmasiga yotqizilgan.